وەزارەتی نەوتی عێراق: هەناردەی نەوتی کوردستان دەستیپێکردەوە

ئاڤا نیوز

وەزارەتی نەوتی عێراق لەبارەی دەستپێکردنەوەی هەناردەکردنی نەوتی کوردستان ڕایدەگەیێنێت ئەم هەنگاوە نوێیە وەک پێشکەوتنێکی گرنگ لە بەڕێوەبردنی سامانی نیشتمانی و پاڵپشتی ئابووری وڵات دادەنرێت.

وێنە گەورەکە: دوای دوو ساڵ و شەش مانگ و دوو ڕۆژ لە وەستانی، بەرەبەیانی ئەمڕۆ شەممە 27ـی ئەیلوولی 2025 جارێكی دیكە هەناردەکردنی نەوتی هەرێمی کوردستان دەستی پێكردەوە.

ڕاگەیێنراوی فەرمی: بەگوێرەی ڕاگەیێنراوی وەزارەتی نەوتی عێراق، پڕۆسەکانی کارپێکردن لە کاتژمێر شەشی بەیانییەوە بە خێراییەکی زۆر و بە شێوەیەکی تەواو دەستیانپێکرد، بێ ئەوەی هیچ کێشەیەکی تەکنیکی بەرچاو تۆمار بکرێت. ئەمەش سەرکەوتنی هەوڵە هاوبەشەکانی نێوان حکومەتی فیدراڵی و حکومەتی هەرێم نیشان دەدات لە بەدەستهێنانی ئەم دەستکەوتە گرنگەدا.

لەلایەکی دیکەوە: وەزارەتی نەوتی عێراق دەڵێت: ئەم پێشهاتە هەنگاوێکی بەرچاوە بۆ بەهێزکردنی بەڕێوەبردنی سامانی نیشتمانی بە گیانی هاوبەشی و هەماهەنگییەکی بەرز، بە شێوەیەک کە یارمەتیدەر بێت لە دڵنیابوون لە بەردەوامی هەناردەکانی نەوت و پشتگیریکردنی ئابووری نیشتمانی.

ئەوەی پێویستە بیزانیت: ڕۆژی 25ی 3ی2023، لەسەر سكاڵایەكی عێراق دادگەی نێودەوڵەتی بۆ نێوبژیوانی لە پاریس دۆسیەکەی لە بەرژەوەندی عێراق یەکلایی کردەوە و هەناردەی نەوتی هەریمی كوردستانی وەستا.


نوێدەکرێتەوە...