یەکەم لێدوانی سەرۆکوەزیران مەسرور بارزانی دوای هەناردەکردنەوەی نەوتی کوردستان

ئاڤا نیوز

سەرۆكوەزیران مەسرور بارزانی ڕایدەگەیەنێت، ڕۆڵی ئەمریكا لە سەرخستنی پرۆسەی هەناردەكردنەوەی نەوتی هەرێمی كوردستان، گرنگ و كاریگەر بوو. هاوكات ڕێككەوتنەكەی بە دەسكەوتێكی گەورە بۆ هەموو خەڵكی عێراق و، هەرێمی كوردستان بەتایبەت وەسف كرد.

وێنە گەورەكە: دوای وەستاندنی هەناردەكردنی نەوتی هەرێمی كوردستان بۆ ماوەی زیاتر لە 30 مانگ بۆ بازاڕی جیهانی، ئەمڕۆ شەممە 27ـی ئەیلوولی 2025، بەشێوەیەكی فەرمی هەناردەكردنی نەوت لەڕێگەی بۆڕی بەرەو بەندەری جەیهانی توركیا دەستیپێكردەوە.

لێدوانی فەرمی: مەسرور بارزانی لەمیانی بەشداریكردنی لە مەراسیمی گەورەی كریستیانەكان وتارێكی پێشكەشكرد و لەمیانی وتارەكەی تیشكی خستەسەر ڕێككەوتنی دەستپێكردنەوەی هەناردەی نەوتی كوردستان و ڕایگەیاند، "ڕێككەوتنی نەوت لەگەڵ حكومەتی فیدڕاڵ دەسكەوتێكی گەورەیە بۆ هەموو عێراق و بەتایبەتی خەڵكی هەرێمی كوردستان."

سەرۆكی حكومەتی هەرێمی كوردستان وتیشی: "دەستخۆشی لە هەموو ئەو كەسایەتیی و لایەنانە دەكەم كە ڕۆڵێكی گرنگیان گێڕا لە سەرخستنی ئەو پرۆسەیە، بەتایبەتی ویلایەتە یەكگرتووەكانی ئەمریكا كە چ لە واشنتن، چ لەرێگەی باڵیۆزی ئەو وڵاتە لە بەغدا و كۆنسوڵی گشتییان لە هەولێر، كە بەڕاستی پاڵپشتی گەورە بوون بۆ سەرخستنی ئەو پرۆسەیە."


مەسرور بارزانی هیوای خواست ئەو ڕێككەوتنە ببێتە هۆكاری پێشخستنی ژێرخانی ئابووری و لە خزمەتی هەموو هاووڵاتیاندا بێت.