چوار کەنیسەی نوێ لە هەولێر و دهۆک دەکرێنەوە

ئاڤا نیوز

 

سەرۆکوەزیران مەسرور بارزانی دەڵێت، بەمەبەستی زیاتر گرنگیدان بە پێکەوەژیان و ئاشتی لە هەرێمی کوردستان چوار کەنیسە لە پارێزگای هەولێر و دهۆک دەکرێنەوە.

 

چیرۆکی سەرەکی: ئەمڕۆ شەممە بە ئامادەبوونی سەرۆکوەزیران مەسرور بارزانی کۆنفرانسی ساڵیادی نیقیە لە شاری هەولێر بەڕێوەچوو، کۆنفرانسەکە بەبۆنەی تێپەڕبوونی 1700 ساڵە بەسەر دامەزراندنی یەکەم ئەنجوومەنی قەشەکان لە کڵێسای نیقیە، لە ساڵی 325ـی زایینی.

 

ئەوەی پێویستە بیزانیت: لە کۆنفڕانسەکە سەرۆکوەزیران مەسرور بارزانی، ئاماژەی بە گرنگی پێکەوەژیان و ئاشتیانەی هەرێمی کوردستان کرد، کە یەکێکە لە سیما دیارەکانی کۆمەڵگەی کوردستان، ئاماژەی بەوەشکرد، پێویستە مامۆستایانی سەرجەم ئایینەکان ڕۆڵی خۆیان لە پەرەپێدانی ئەم پیکەوە ژیانە بگێرن.

 

لێدوانی فەرمی: سەرۆکوەزیران مەسرور بارزانی ڕایگەیاند، بڕیارە بەمزووانە چوار کەنیسە لە پارێزگای هەولێر و دهۆک بکرێنەوە، ئەمەش بەمەبەستی زیاتر گرنگیدان بە پێکەوەژیان و ئاشتی لە هەرێمی کوردستان.

لەلایەکی دیکە: سەرۆکوەزیران مەسرور بارزانی ئاماژەی بەوەکرد، ئێستا 50 قوتابخانەی تایبەت بە زمانی سریانی لە هەرێمی كوردستان هەن، حكومەتی هەرێمی كوردستان بەردەوام دەبێت لە چەسپاندنی بنەماكانی ئازادیی ئایینی، هیوادارم دەرئەنجامەكانی ئەم كۆنفرانسە خزمەتی بەهێزكردنی كولتووری بەیەكەوەژیانی ئاشتیانە بكات لە هەرێمی كوردستان، هەرێمی كوردستان وەك هەمیشە مەڵبەندێكی درەوشاوەی پێكەوەژیان دەبێت.