وادەی ئەنجامدانی تیروپشک بۆ ناوی حاجیان ئاشکرا دەکرێت

ئاڤا نیوز

 

ڕۆژی هەینی 26ـی ئەیلوول، كۆتا وادەی دیاری كراو بوو بۆ خۆتۆماركردنی هاونیشتمانیان بۆ فەریزەی حەج، وتەبێژی حەج و عومرەی كوردستانیش تایبەت بۆ ئاڤا ئاشكرای دەكات، كۆی گشتی ئەو كەسانەی خۆیان بۆ حەج تۆماركردووە زیاتر لە 87 هەزارە.

 

وێنە گەورەكە: هەرچەندە بڕیاربوو 20ـی ئەم مانگە، کۆتا ڕۆژی تۆمارکردنی ناوی حاجیان بێت، بەڵام لەسەر فەرمانی وەزیری ئەوقاف و كاروباری ئایینی، وادەكە بۆ 26ـی ئەم مانگە درێژ کرایەوە، ئەمەش وەک هاوکارییەک بۆ ئەو کەسانەی نەیانتوانیبوو ناویان تۆمار بکەن.

 

لێدوانی فەرمی: کاروان ستوونی، وتەبێژی بەڕێوەبەرایەتیی حەج و عومرەی كوردستان بە ئاڤای ڕاگەیاند: لە ماوەی ئەو شەش ڕۆژەی كە بۆ پرۆسەكە درێژكرایەوە زیاتر لە شەش هەزار كەس ناوی خۆیان نووسیوە و لە بڕیاری درێژكردنەوەكە سوودمەند بوون.

 

زانیاریی زیاتر: لەماوەی بەردەستبوونی تۆماركردنی ئەلیكترۆنی بۆ فەریزەی حەج، زیاتر لە 60 هەزار كەس فۆڕمیان پڕ كردووەتەوە، هەندێك فۆڕم هەیە بۆ چەند كەسێك پڕكراونەتەوە هەر بۆیە كۆی گشتیی ئەو هاونیشتمانیانەی ناویان تۆمار كراوە بۆ تیروپشك گەیشتووەتە سەرووی 87 هەزار كەس، كە تا کۆتایی مانگی 10ـی ئەمساڵ تیروپشك بۆ ناوەكان دەكرێت و هەموو ئامادەكارییەكان تەواو دەبن.