لە کابینەی نۆیەمدا بە بەهای زیاتر لە 7.5 ملیار دۆلار پرۆژەی گەشتیاری جێبەجێکراون

ئاڤا نیوز

حكومەتی هەرێمی كوردستان لە ڕۆژی جیهانیی گەشت ئاشكرای دەكات، لە ماوەی كابینەی نۆیەمدا، 80 پرۆژەی نوێی گەشتیاری بە بەهای حەوت ملیار و 555 ملیۆن و 305 هەزار دۆلار، جێبەجێ كراون و، بەهۆیەوە ژێرخانی گەشتیاریی هەرێمی كوردستان بەهێز بووە.

وێنە گەورەكە: 27ـی ئەیلوولی هەموو ساڵێک، ڕۆژی جیهانیی گەشتە و ئەو ڕۆژەش لەلایەن ڕێکخراوی گەشتیاریی جیهانیی سەر بە نەتەوە یەکگرتووەکانەوە دیاری کراوە، هەرێمی كوردستانیش كە خاوەنی كەشوهەوا و خاكێكی گونجاوە بۆ گەشتیاری و زیاتر لە سێ هەزار شوێن و بنكەی گەشتیاری هەیە، بایەخێكی تایبەت بەو سێكتەرە دەدرێت لەپێناو ئەوەی ببێتە سەرچاوەیەكی گرنگی داهات بۆ هەرێمی كوردستان.

لێدوانی فەرمی: ئیبراهیم عەبدولمەجید، وتەبێژی دەستەی گشتیی گەشتوگوزاری هەرێمی كوردستان بە ئاڤای ڕاگەیاند، لە کەرتی گەشتیاری، کابینەی نۆیەمی حکومەتی هەرێمی کوردستان، هەنگاوی گرنگی ناوە و ژێرخانێکی بەهێزی بۆ دروست کردووە؛ لەماوەی پێنج ساڵدا، 80 پرۆژەی نوێی گەشتیاری، بە گوژمەی 7 ملیار و 555 ملیۆن و 305 هەزار دۆلار جێبەجێ کراون.

ژمارەكان وادەڵێن: لە هەرێمی كوردستان زیاتر لە سێ هەزار بنکەی گەشتیاری تۆمار کراون، بەجۆرێك؛ 480 هۆتێل، 282 مۆتێل، 44 کۆمەڵگای گەشتیاری، 20 گوندی گەشتیاری، نزیکەی 1000 ڕێستۆڕانت و خواردنی خێرا، نزیکەی 700 کافتریا و 28 شاری یاری.

بۆچی گرنگە: ئەم گەشەپێدانە کە هاوکاتە لەگەڵ گەشەی ژێرخان و ڕێگەوباندا، بووەتە هۆی زیاتر ڕاکێشانی گەشتیارانی ناوەوە و دەرەوە و بووژاندنەوەی کەرتی گەشتیاری، کە ساڵانە زیاتر لە 7-8 ملیۆن کەس دەبنە گەشتیاری کوردستان.