مۆنتی کارلۆ: دوای هەڕەشەکەی نەتانیاهۆ، گرووپە چەکدارەکانی عێراق و سەرکردەکانیان ڕێکاری خۆپارێزیی دەگرنەبەر

ئاڤا نیوز

دوای وتارەکەی نەتانیاهۆ لە بارەگای نەتەوەیەکگرتووەکان، گرووپە چەکدارەکانی عێراق دەستیان کردووە بە گرتنەبەری ڕێوشوێنی خۆپارێزی، لەوانەش چۆڵکردنی شوێنە سەرەکییەکان، هاوکات سەرکردەکانیان دەستبەرداری مۆبایلەکانیان بوون. ئەمەش بەپێی ڕاپۆرتێکی ڕادیۆی مۆنتی کارلۆ.

چیرۆکی سەرەکی: ڕۆژی هەینی، 2025-09-26،  بنیامین نەتانیاهۆ، سەرۆکوەزیرانی ئیسرائیل لە وتارێکدا لەبەردەم کۆبوونەوەی گشتی نەتەوەیەکگرتووەکان هەڕەشەی لەناوبردنی سەرکردەی گرووپە چەکدارەکانی عێراقی کرد لە ئەگەری هێرشکردنە سەر ئیسرائیل. 

زانیاری بەدەستهاتوو: ڕادیۆی مۆنتی کارلۆ کە ڕادیۆیەکی فەرەنسییە و پەخشی بۆ ڕۆژهەڵاتی ناوەڕاستە ئاشکرای کردووە، سەرکردە سیاسییە سەرەکییەکانی ناو هاوپەیمانیی چوارچێوەی هەماهەنگیی شیعەکان لەوانە هادی عامری، سەرۆکی ڕێکخراوی بەدر و نووری مالیکی، سەرۆکی هاوپەیمانیی دەوڵەتی یاسا ڕێکاری خۆپارێزیان تووندتر کردوەتەوە.

زانیاریی زیاتر: بەگوێرەی ڕاپۆرتەکەی ڕادیۆی مۆنتی کارلۆ هەڵسەنگاندنە ئەمنی و سیاسییەکان لە بەغدا بۆ هەڕەشەکانی نەتانیاهۆ گەیشتوونەتە ئەو ئەنجامەی، سەرۆکوەزیرانی ئیسرائیل یان هەوڵدەدات گڵۆپی سەوزی ئەمریکا بەدەستبهێنێت بۆ دەستپێکردنی هێرش بۆ سەر ئەو گرووپانە و تیرۆرکردنی سەرکردەکانیان، یان دەیەوێت لەگەڵ ئەمریکییەکان هەماهەنگی بکات بۆ ئەوەی ئەو کارە بەجێ بگەیەنێت.