بەهۆی بانکی TBI گرفت بۆ خەرجکردنی شایستەی دارایی جووتیاران دروست دەبێت

ئاڤا نیوز

بڕیاربوو سبەی دەست بە دابەشکردنی شایستە داراییەکانی گەنمی جووتیارانی هەرێمی کوردستان بکرێت، بەڵام بەهۆی گرفتێکی هونەری بانکی TBI پڕۆسەکە دوادەکەوێت.

وێنە گەورەکە: لە سەرەتای وەرزی هاوینەوە جووتیارانی هەرێمی کوردستان گەنمیان ڕادەستی سایلۆکان کردووە، بەڵام بەهۆی کەمتەرخەمی وەزارەتی بازرگانیی عێراق لە پاییزدا ئەو جووتیارانەی لە سەرەتاوە گەنمیان ڕادەستکردووە پارەکانیان وەردەگرن، ئێستاش بەهۆی سنوورداری توانای بانکی TBI لە خەرجکردنی چەکی پارە، پرۆسەکە دوادەکەوێت.

لێدوانی فەرمی: هێمن سەید موراد، بەڕێوەبەری گشتیی کشتوکاڵی هەولێر بە ئاڤای گوت، "هەموو ئامادەکارییەک کراوە و سەرجەم ڕێکارەکان جێبەجێکراون تەنیا خەرجکردنی پارەکە ماوە، بەڵام بانکی TBI هۆشداری داوە کە ناتوانن بەیەک قۆناغ 20 ملیار دینار خەرج بکەن، ئەمەش وادەکات چەند ڕۆژێک پڕۆسەکە دوابکەوێت."

چارەسەرەکان: وەزارەتی بازرگانی هەرێمی کوردستان لەگەڵ وەزارەتی بازرگانی عێراق لەسەر هێڵە، بۆ ئەوەی پارەکە لەو بانکەوە بگوازنەوە سەر بانکەکانی هەرێمی کوردستان و گرفتەکە چارەسەر ببێت، ماوەتەوە سەر ئەوەی بانکی TBI بە نووسراو چەکەکان بگوازێتەوە بانکێکی هەرێمی کوردستان.

ئەمەش بزانە: ئەو بڕەی بۆ هەر چوار پارێزگای هەرێمی کوردستان هاتووە 57 ملیار دینارە، 20 ملیار بۆ هەولێر، 25 ملیار سلێمانی و هەڵەبجە، 12 ملیار دیناریش بۆ دهۆک تەرخانکراوە.