لە هیندستان بەهۆی قەرەباڵغی بانگەشەی هەڵبژاردن 36 کەس گیانیان لەدەستدا

ئاڤا نیوز

بەهۆی قەرەباڵغییەوە لە بانگەشەی هەڵبژاردن لە ویلایەتی تامیل نادوی هیندستان، لانیکەم 36 کەس گیانیان لەدەستدا و بە دەیان کەسی دیکە برینداربوون.

چیرۆکی سەرەکی: لەکاتی وتاردان بۆ بانگەشەی هەڵبژاردن لەلایەن ڤیجای، ئەکتەری هیندی، کە تازە چووەتە ناو سیاسەتەوە و بەهۆی زۆری ژمارەی ئامادەبووان پاڵەپەستۆ دروستبووە و بە دەیان کەس گیانیان لەدەستدا.

زانیاریی زیاتر: بەهۆی قەرەباڵغییەکەوە، 36 کەس گیانیان لەدەستدا کە لە نێویاندا هەشت منداڵ و 16 ژن هەیە و نزیکەی 58 کەسی دیکەش برینداربوون.

زانیاریی بەدەستهاتوو: حکومەتی خۆجێی ویلایەتەکە بڕیاریدا 11 هەزار دۆلار قەرەبوو بداتە خێزانی قوربانییەکان و لیژنەیەکی لێکۆڵینەوەشیان بۆ ئاشکراکردنی هۆکاری پشت ڕووداوەکەوە پێکهێنا.

لەلایەکی دیکەوە: نارێندرا مۆدی، سەرۆکوەزیرانی هیندستان ڕایگەیاند، ئەو ڕووداوە دڵتەزێنەی لە شاری کارور لە ویلایەتی تامیل نادو ڕوویدا، زۆر ناخۆشە و پرسە و سەرەخۆشی خۆم ئاراستەی ئەو خێزانانە دەکەم کە لەم بۆنەیەدا ئازیزانیان لەدەستداوە و نزا دەکەم بریندارەکان زوو چاک ببنەوە.

ئەمەش بزانە: ڕووداوەکانی لەو جۆرە لە هیندستان بەربڵاون، بەتایبەتی لە بۆنە ئایینییەکان و گردبوونەوە گەورەکاندا و تەنیا لە مانگی یەکی ئەمساڵدا 30 کەس لە بۆنەیەکی ئایینیدا لەو وڵاتە گیانیان لەدەستدا.