کۆمیسیۆن بۆ ئاڤا: لەم هەفتەیەدا لیستی کۆتایی ناوی کاندیدەکان ڕادەگەیێنرێت

ئاڤا نیوز

کۆمیسیۆنی باڵای سەربەخۆی هەڵبژاردنەکانی عێراق ڕایگەیاند، پرۆسەی وردبینیی لەناوی کاندیدەکان بۆ بەشداریکردن لە هەڵبژاردنی پەرلەمان لە قۆناغی کۆتایی دایە و لەم هەفتەیەدا لیستی کۆتایی ناوی کاندیدەکان ڕادەگەیێنرێت.

وێنە گەورەکە: پرۆسەی وردبینی لەناوی کاندیدەکان بۆ هەڵبژاردنی مانگی 11ی ئەمساڵی پەرلەمانی عێراق جیاوازبوو، بەهۆی ئەوەی کۆمیسیۆن تائێستا زیاتر لە 750 کاندیدی بەهۆکاری جیاواز دوورخستووەتەوە، بەشێکی زۆریان بەتۆمەتی ئەندامبوون بووە لە حیزبی بەعسی ڕووخاو بوو، بڕیاریشە سەرەتای مانگی داهاتوو بانگەشەی هەڵبژاردن دەستپێبکات.

لێدوانی فەرمی: بیلال ئەکرەم عەباس، سەرۆکی تیمی ڕاگەیاندن لە کۆمیسیۆنی هەڵبژاردنەکانی عێراق بە ئاڤا میدیای ڕاگەیاند، بەئەگەری زۆرەوە لەم هەفتەیەدا پرۆسەی وردبینیی لە شیاویەتی کاندیدەکان بۆ بەشداریکردن لە هەڵبژاردنی پەرلەمانی عێراق کۆتایی دێت و کۆمیسیۆن لیستی کۆتایی ناوی کاندیدەکان ڕادەگەیێنێت.

باکگراوند: بۆ هەڵبژاردنی پەرلەمانی عێراق کە بڕیارە لە 11ی 11ی ئەمساڵدا بەڕێوەبچێت 21 ملیۆن و 404 هەزار و 291 کەس مافی دەنگدانیان هەیە، زیاتر لە حەوت هەزار کاندیدیش کێبڕکێ لەسەر 329 کورسییەکەی پەرلەمان دەکەن.