سەرجەم دەرچووانی پۆلی 12ی ئامادەی لە زانکۆ و پەیمانگەکان وەردەگیرێن

ئاڤا نیوز

ئەمساڵ زیاتر لە 57 هەزار دەرچووی پۆلی 12ی ئامادەیی دەتوانن فۆرمی داواکاریی وەرگرتن لە زانکۆ و پەیمانگاکان پێشکەش بکەن، وەزارەتی خوێندنی باڵاش دووپاتی دەکاتەوە هەلی خوێندن لە زانکۆ حکومییەکان بۆ هەموویان ڕەخسێنراوە.

وێنە گەورەکە: 23ـی ئەم مانگە سیستمی زانکۆلاین بۆ دەرچووانی 12ی ئامادەی کارا کرا و تاوەکو 30ی ئەم مانگە بە کارای دەمێنێتەوە، لەماوەی ئەم هەشت ڕۆژەدا دەرچووان دەتوانن فۆرمی داوکاری ئەلیکترۆنی بۆ وەرگرتن لە زانکۆ و پەیمانگاکان پڕبکەنەوە.

لێدوانی فەرمی: عەباس ئەکرەم، گوتەبێژی وەزارەتی خوێندنی باڵا و توێژینەوەی زانستی بە ئاڤا میدیای گوت: ئەمساڵ هاوشێوەی ساڵانی ڕابردوو هیچ قوتابییەکی پۆلی 12ی ئامادەیی لە دەرەوەی پلانی وەرگرتن نامێنێتەوە و ئەوەی داواکاری پێشکەش بکات، بەپێی کۆنمرە و داواکاری خۆی لە زانکۆ و پەیمانگە حکومییەکان وەردەگیرێت و دەرفەتی خوێندن بۆ هەموو خەڵکێک دەڕەخسێنرێت.

زانیاریی زیاتر: بۆ ئەمساڵ 57 هەزار 980 دەرچووی ئامادەیی بە هەموو بەشەکانییەوە (زانستى، وێژەیی، پیشەیی، خوێندنگە نێودەوڵەتییەکان) لە یەک کاتدا داواکارى بۆ زانکۆلاین پێشکەش دەکەن، بەمجۆرەی خوارەوە:


بەشی زانستی: 42 هەزار و 257 دەرچوو
بەشی وێژەیی: 13 هەزار و 826 دەرچوو
بەشەکانی پیشەیی: هەزار و 327 دەرچوو
قوتابخانە نێودەوڵەتییەکان: 570 دەرچوو

ئەوەی پێویستە بیزانیت: بۆ ساڵی خوێندنی 2025-2026 دەرچووانی پۆلی 12ی ئامادەیی داواکارى بۆ 680 بەش لە هەرسێ جۆر خوێندنى زانکۆلاین و پارالێل و ئێواران لە 16زانکۆى حکومى لە هەرێمى کوردستان پێشکەش دەکەن.