ڕێبەر ئەحمەد: تەکنەلۆژیا و درۆنی پێشکەوتوو لە کوژاندنەوەی ئاگر بەکاردەهێنرێت

ئاڤا نیوز 

وەزیری ناوخۆی کوردستان لە مەراسیمی ناساندنی ڕێبەری سەلامەتی باسی لەوەکرد، توانادارکردنی بەرگریی شارستانی لە قۆناغی زێڕینە و لە ئایندەیەکی نزیکدا تەکنەلۆژیا و درۆنی پێشکەتوو لە کوژاندنەوەی ئاگر بەکاردەهێنین.

وێنە گەورەکە: ئەمڕۆ یەکشەممە 28-9-2025 بە ئامادەبوونی سەرۆکوەزیران مەسرور بارزانی، مەراسیمی ڕاگەیاندنی ڕێبەری سەلامەتی لە هەولێر بەڕێوەچوو، تیایدا ڕێبەرێکی حەوت بەرگی لەبارەی سەلامەتی فریاکەوتن ڕاگەیێنرا.

لێدوانی فەرمی: ڕێبەر ئەحمەد، وەزیری ناوخۆی هەرێمی کوردستان گوتی: لە کابینەی نۆیەمی حکومەتی هەرێمی کوردستان، چاکسازی گرنگ لە هەموو ئەدای هەموو دامەزراوەکانی وەزارەتی ناوخۆ کراوە، بۆ ئەوەی لەگەڵ بەرنامەی کابینەی نۆیەم و دونیابینی سەرۆکوەزیران بۆ خزمەتی زیاتری هاونیشتمانیان و بەرزکردنەوەی کوالێتی خزمەتگوزارییەکان بگونجێت.

- بەرەوپێشچوونی گەورە لە هەموو دامەزراوەکانی وەزارەتی ناوخۆ ڕوویداوە کە کاریگەریی لەسەر  ئەدای دامەزراوەکان هەبووە.

- لە دامەزراوەکانی بەرگریی شارستانی هەوڵی جدیمانداوە بۆ ئەوەی توانای دامەزراوەکانمان هاوشانی بنەما جیهانییەکانی کارکردن بەرزبکرێتەوە.

- بنەما سەرەکییەکانی دامەزراوەکانی بەرگریی شارستانی بۆ ئەم ئەرکە (ڕێگری لە کارەسات، ئامادەکاری بۆ ڕووبەڕووبوونەوە، وەڵامدانەوە لەکاتی کارەسات و قەیران، هاوکاری و هەماهەنگی خەڵک بۆ ژیانەوە و هەڵسانەوە.

-    بۆ ئامادەکاری بۆ ئەم ئەرکانە و لەژێر فەرمانی سەرۆکوەزیران مەسرور بارزانی ئاستی ئیداری بەرگریی شارستانی بۆ بەڕێوەبەرایەتیی بەرزکرایەوە و لە دامەزراوەی پۆلیس جیاکرایەوە.

وەزیری ناوخۆی هەرێمی کوردستان ئەمانەشی گوت: 

-    ئەمڕۆ بۆ یەکەمجار هەرێمی کوردستان دەبێتە خاوەن کۆد و ستانداردی تایبەت بۆ خۆی لەبواری سەلامەتی، کە لەلایەن حکومەتی هەرێمی کوردستان بە خاوەنکاران و دامەزراوەکان دەدرێت و دەبنە دەستووری بونیادنانی باڵەخانە و شوێنەکانی نیشتەجێبوون و وێستگەکانی سووتەمەنی و غازی شل و گواستنەوەی ماددە مەترسیدارەکان.

- باشترین جۆرەکانی ئۆتۆمبێل و ئامێرەکانی ئاگرکوژاندەنەوە و ڕزگارکردن بە قەبارەی گەورە و بچووک، لە باشترین براندەکانی دونیا لەبەردەستی تیمەکانمانە و ڕۆژانە بۆ پاراستنی گیانی هاونیشتمانیان بەکاریان دەهێنن.

- ساڵ دوای ساڵ تواناکان بەهێزتر دەبن و لە ئایندەیەکی نزیکدا تەکنەلۆژیای پێشکەوتوو و درۆن لە کوژاندنەوەی ئاگر بەکاردەهێنین.