لیستی مووچەی مانگی نۆ ئامادە دەکرێت و دەدرێتە بەغدا

ئاڤا نیوز

 

وەزارەتی دارایی و ئابووریی هەرێمی کوردستان لەدوایین قۆناغەکانی ئامادەکردنی لیستی مووچەی مانگی نۆی مووچەخۆراندایە، ئەمڕۆ تەواو دەبێت و لە نزیکترین کاتدا بۆ وەزارەتی دارایی عێراق دەنێردرێت.

 

وێنە گەورەکە: دوای ڕێککەوتنی نێوان هەولێر و بەغدا لەبارەی هەناردەکردنەوەی نەوتی کوردستان و دەستپێکردنەوەی پرۆسەکە، حکومەتی هەرێمی کوردستان دەیەوێت جگە لە مووچەی مانگی حەوت کە بڕیارە لەم هەفتەیە خەرج بکرێت، مووچەی مانگەکانی دیکەی ئەمساڵ گەرەنتی بکرێت، بۆ ئەو مەبەستەش وەزارەتی دارایی بەخێرایی کار لەسەر ئامادەکردنی لیستی مووچە و تەرازووی پێداچوونەوە دەکات.

 

لێدوانی فەرمی: سەرچاوەیەک لە وەزارەتی دارایی و ئابووریی هەرێمی کوردستان بە ئاڤای گوت، "ئەمڕۆ لیستی مووچەی مانگی نۆ تەواو دەبێت و لەنزیکترین کاتدا ڕەوانەی وەزارەتی دارایی عێراق دەکرێت، بۆ مانگی نۆ 900 خانەنشینی نوێ تۆمارکراون و نۆ مووچە بەیەکەوە وەردەگرن."

 

زانیاریی زیاتر: سەبارەت بە خەرجکردنی مووچەی مانگی حەوت ئەو سەرچاوەیە ئاماژەی بەوەدا، ئەمڕۆ وەزارەتی دارایی عێراق نووسراو بۆ بانکی فیدراڵی دەکات، ئەوانیش نووسراو بۆ لقی هەولێر دەکەن و ئەوانیش وەڵامیان دەدەنەوە کە پارە ئامادەیە بۆ دابەشكردنی مووچە و دەخرێتە سەر هەژماری وەزارەتی دارایی هەرێمی کوردستان. 

 

ئەوەی پێشبینی دەکرێت؛ سەبارەت بە مووچەی مانگی هەشت حکومەتی هەرێمی کوردستان چاوەڕێی ئەوە دەکات، سەرەتای مانگی داهاتوو پارەکە خەرج بکرێت.