عەلی عەللاق دەنگۆیەک لەبارەی گۆڕانکاریکردن لە نرخی فەرمیی دۆلار ڕەت دەکاتەوە

ئاڤا نیوز

عەلی عەللاق، پارێزگاری بانکی ناوەندیی عێراق دەڵێت، هیچ هەوڵێک لە ئارادا نییە بۆ دەستکاریکردنی نرخی فەرمیی دینار بەرامبەر بە دۆلار، هاوکات ئاماژەی بەوەشکرد، لە ئێستادا عێراق کەمترین ڕێژەی هەڵاوسانی لە مێژوودا بەخۆیەوە دەبینێت. 

 

ڕاگەیێنراوی فەرمی: عەلی عەللاق لە کۆڕبەندی عێراق بۆ وەبەرهێنان لە بەغدا، ڕایگەیاند: "هیچ گفتوگۆیەک لەناو بانکی ناوەندی یان حکومەتدا نییە سەبارەت بە دەستکاریکردنی نرخی فەرمی ئاڵوگۆڕی دۆلار، هەموو ئەو شتانەی دەنگۆی لەسەرە دوورە لە ڕاستییەوە."

 

گۆشەیەکی دیکەی دیمەنەکە: ئێستا عێراق لە قۆناغی سەقامگیری و چاکسازی و کراوەیی بەڕووی وەبەرهێناندا تێدەپەڕێت، عێراق ئەمڕۆ لە نزمترین ئاستی ڕێژەی هەڵاوسانە لە مێژووی خۆیدا، ئەمەش ڕەنگدانەوەی سەرکەوتنی سیاسەتە دراوییەکانە لە کۆنترۆڵکردن و بەڕێوەبردنی جوڵەی دراوەکان، هاوکات لەگەڵ بوونی یەدەگی بیانیی پێویست کە توانای بەرگریکردن لە نرخی ئاڵوگۆڕی دراو و بەدەستهێنانی هاوسەنگییەکی بەرچاو لە نێوان خستنەڕوو و خواست لەسەر دراوی بیانی هەیە.

 

ئەوەی پێویستە بیزانیت: لەماوەی چەند ساڵی ڕابردوودا نرخی دۆلار بەرامبەر دیناری عێراقی بەشێوەیەکی بەرچاو گۆڕانکاریی بەخۆیەوە بینیوە، ئەمەش دوای ئەوەی حکومەتی پێشوو بە سەرۆکایەتیی مستەفا کازمی نرخی دۆلاری بەرامبەر دینار گۆڕی و هەر 100 دۆلارێک لە 121 هەزارەوە گەیشتە 140 هەزار دینار.