نزیكەی 80%ـی كارەكانی مۆزەخانەی ئەنفال لە دهۆک تەواوبووە

ئاڤا نیوز

 

كارەكانی قۆناغی دووەمی دروستكردن و نۆژەنكردنەوەی مۆزەخانەی نیشتمانیی قەڵای نزاركێ لە دهۆك بەرەو تەواوبوون دەچێت، لە ئاییندەیەكی نزیكدا قۆناغی سێیەم و كۆتایی پرۆژەكە دەست پێ دەكات.

 

چیرۆكی سەرەكی: ڕۆژی 14-4-2024 لە ساڵیادی ئەنفالی دەڤەری بادینان، پارێزگاری دهۆك بەردی بناغەی مۆزەخانەی نیشتمانیی ئەنفالی لە قەڵای نزاركێ دانا، كە دروستكردن و نۆژەنكردنەوەی شوێنەكە، بڕی ملیارێك و 271 ملیۆن دیناری بۆ تەرخانكراوە.

 

ئەوەی پێویستە بیزانیت: قەڵای نزاركێ لە سەردەمی ڕژێمی پێشووی بەعس لەسەر ڕووبەری 36 هەزار مەتر دووجا دروستكرا، لە شاڵاوی ڕەشی ئەنفالی ساڵی 1988ـی دەڤەری بادینان، ئەو قەڵایە ببووە شوێنی ئەشكەنجەدان و ئازاردانی هاونیشتمانیان، لە مانگی نیسانی ساڵی ڕابردوو، بڕیاردرا ئەو شوێنە ببێتە سیمبولی ئەنفالی بادینان و قەڵاكە لەسەر هەمان دیزاینی خۆی بونیاد بنرێتەوە و مۆزەخانەیەكی نیشتمانی تێدا دروست بكرێت كە سەرجەم كارەساتەكانی ئەنفال لە ڕاگواستن، سووتاندن، كوشتن، ئەشكەنجەدان و وێرانكردنی گوندەكانی تێدا بەرجەستە بكرێت و هاووڵاتیان و گەشتیاران بۆ بینینی مەینەتییەكانی خەڵكی دەڤەرەكە لە سەردەمی ڕژێمی بەعسی ڕووخاو، سەردانی بكەن.

 

لێدوانی فەرمی: ماجد سەید ساڵح، جێگری پارێزگاری دهۆك لەبارەی نوێترین هەنگاوەكانی بوونیادنانی مۆزەخانەی نیشتمانیی ئەنفال و نۆژەنكردنەوەی قەڵای نزاركێ ڕایگەیاند، پرۆژەكە لە سێ قۆناغ پێكهاتووە، قۆناغی یەكەمی تەواوبووە و قۆناغی دووەمیشی زۆربەی كارەكانی جێبەجێ كراون كە خۆی دەبینێتەوە لە دروستكردنی ژمارەیەك هۆڵ و بەردڕێژكردنی ڕێگە لاوەكییەكانی نێو قەڵاكە و كاشیكردنی هۆڵەكان و دانانی پەنجەرەی كلاسیكی بە دیزاینی كۆن و بۆیاغكردنی چەند بەشێكی. گوتیشی تێچووی كارەكانی قۆناغی دووەمی پرۆژەكە، 545 ملیۆن دینارە.

 

زانیاریی زیاتر: جێگری پارێزگای دهۆك ئاماژەی بەوەشكرد، لەمنزیكانە قۆناغی سێیەم و كۆتایی پرۆژەكە دەست پێ دەكات كە گوژمەی 636 ملیۆن دیناری بۆ تەرخانكراوە، كۆی پرۆژەكەش بەهای ملیارێك و 271 ملیۆن دیناری بۆ تەرخانكراوە.