پڕۆژەیەکی گەورەی ئاو لە خەبات دەچێتە بواری جێبەجێکردنەوە

ئاڤا نیوز

سەرۆکی حکومەتی هەرێمی کوردستان ڕەزامەندی لەسەر دروستکردنی پڕۆژەیەکی گەورەی ئاوی لە قەزای خەبات دا، بە جێبەجێکردنی ئەم پڕۆژەیە کێشە و گرفتی کەمئاوی لەو سنوورە بە تەواوی چارەسەر دەبێت.

وێنە گەورەکە: پڕۆژەی ئاوی خەبات، پڕۆژەیەکی گەورە و ستراتیژی کابینەی نۆی حکومەتی هەرێمی کوردستانە، کە توانای بەرهەمهێنانی 20 هەزار مەتر سێجا ئاوی خواردنەوەی لە یەک کاتژمێر و 480 هەزار مەتر سێجا لە ڕۆژێک دا هەیە ، زیاتر لە 400 هەزار کەس لە سنووری قەزای خەبات و ناحییەکانی ڕزگاری و تۆپزاوە و کەورگۆسک و 40 گوند تاوەکو 2050 لێی سودمەند دەبن.

ڕاگەیێنراوی فەرمی: ڕۆژی 2025-09-28، سەرۆکوەزیران مەسرور بارزانی بڕیاری دروستکردنی پڕۆژەی گەورەی ئاوی لە قەزای خەبات دا، پڕۆژەکەش لەسەر بودجەی وەبەرهێنانی وەزارەتی شارەوانی و گەشتوگوزار دەبێت، بڕی 195 ملیار دیناری بۆ تەرخانکراوە.

بە دروستکردنی ئەم پڕۆژە گەورەیە کێشە و گرفتی کەمئاوی لە سنووری قەزاکە بە تەواویی چارەسەر دەبێت.

ئەمەش بزانە: درێژی بۆڕییەکانی پڕۆژەکە نزیکەی 300 کیلۆمەترە و پێنج کیلۆمەتریش کارەبای لەگەڵدا دەبێت، ئێستا کار لەسەر قۆناغەکانی پڕۆسەی تەندەرینگ دەکرێت، پڕۆژەکە لە ماوەیەکی نزیکدا دەکەوێتە بواری جێبەجێکردنەوە.

باکگراوند: ڕۆژی 16-6-2025، وەزارەتی شارەوانی و گەشتوگوزار بۆ چارەسەرکردنی کێشە و گرفتی کەمئاوی لە سنووری قەزای خەبات، نووسراوی بۆ ئەنجوومەنی وەزیرانی هەرێمی کوردستان بەرزکردەوە.