بەنگلادش وەبەرهێنان لە هەرێمی کوردستان دەکات

ئاڤا نیوز

شاندێکی کۆماری بەنگلادیش بە مەبەستی وەبەرهێنان سەردانی دەستەی وەبەرهێنانی هەرێمی کوردستانی کرد، حکومەتی هەرێمی کوردستانیش ئامادەیی خۆی بۆ هەر ئاسانکارییەک دەربڕی بۆ ئەو وڵاتە دەربڕی.

چیرۆکی سەرەکی: ئەمڕۆ یەکشەممە 28-9-2025، د. محەممەد شوکری، سەرۆکی دەستەی وەبەرهێنان لەگەڵ محەممەد مەقسودول حەق، باڵیۆزی کۆماری بەنگلادیشی میللی لە عێراق بەمەبەستی بەهێزکردنی پەیوەندیی ئابووری و بازرگانی لەگەڵ هەرێمی کوردستان کۆبووە.

لێدوانی فەرمی: بەرگەشت ئاکرەیی، وتەبێژی دەستەی وەبەرهێنان بە ئاڤا میدیای ڕاگەیاند، "لە دوو سێ ساڵی ڕابردوودا چەند جارێک لەگەڵ شاندی جیاجیای وڵاتی بەنگلادیش کۆبوونەوە و دیدارمان هەبووە" کە شاندەکانیان لەسەر ئاستی باڵیۆز و وەزیر و ڕاوێژکارەکانیان پێکهاتبوون.

دەشڵێت، بەنگلادیش فۆکسی زۆری لەسەر عێراق و بە تایبەت هەرێمی کوردستان هەیە، بەو پێیەی هەرێمی کوردستان ئارامی و سەقامگیری زۆر باشی هەیە، بۆیە دەیانەوێت لە هەرێمی کوردستان وەبەرهێنان بکەن.

زانیاریی زیاتر: لە دیدارەکانی پێشووی دەستەی وەبەرهێنان و شاندە جیاجیاکانی بەنگلادیش، باس لەوە کراوە کە بەنگلادیش دەیەوێت کارخانەی گەورەی قوماش و ئاوریشم لە هەرێمی کوردستان بکاتەوە، بۆ ئەم مەبەستە سەرۆکی دەستەی وەبەرهێنان و لایەنەکانی دیکەی پەیوەندیدار لەناو حکومەتی هەرێمی کوردستان ڕاسپێردراون، بۆئەوەی ئاسانکاریی پێویست بۆ ڕێکارەکانی کردنەوەی کارخانە و بابەتی قوماش و جلوبەرگیان بۆ بکەن.