دەنگۆی هەوڵی تیرۆرکردنی سەدر دۆخی بەسرە دەشێوێنێت

ئاڤا نیوز

دەنگۆی هەوڵێک بۆ تیرۆرکردنی موقتەدا سەدر، ڕێبەری ڕەوتی نیشتمانی شیعە لە بەسرە وای لە هێزەکانی سەرایا سەلام باڵی سەربازیی ڕەوتەکە کرد، بە شارەکەدا بڵاوببنەوە.

چیرۆکی سەرەکی: ئەم پشێوییە دوابەدوای ئەوە هات، میدیاکارێک بەناوی عەلی فازڵ لە پرۆگرامێکی تەلەڤزیۆنی باسی لە "هەوڵێک" بۆ تیرۆرکردنی موقتەدا سەدر کرد گوایە بە فڕۆکەیەکی بێفڕۆکەوان دەکرێتە ئامانج، هاوکات "یاسر مالیکی"ـی پەرلەمانتاری بۆ ئەنجامدانی ئەو هەوڵە تۆمەتبار کرد بوو.

بۆچوونی لایەنی بەرامبەر: لە وەڵامدا، پەرلەمانتار یاسر مالیکی پەیامێکی تووندی بڵاوکردەوە و ئەو هەواڵانەی بە "بوختان و درۆ" ناوبرد و بە تووندی نکۆڵی لە هەوڵدان بۆ زیانگەیاندن بە سەدر و خێزانەکەی کرد.

لەهەمان کاتدا: مالیکی جەختی کردەوە کە ئەم تۆمەتانە "هەوڵێکن بۆ دروستکردنی فیتنەیەکی نوێ" بە ئامانجی تێکدانی سەقامگیری وڵات و کاریگەری لەسەر هەڵبژاردنەکانی داهاتوو.