بانگەشەی هەڵبژاردنی ئەنجوومەنی گەلی سووریا دەستپێدەکات

ئاڤا نیوز

لیژنەی باڵای هەڵبژاردنەکانی ئەنجوومەنی گەلی سووریا، داخستنی دەرگای خۆپاڵاوتنی بۆ ئەندامێتی ئەنجوومەنی گەل لەسەر ئاستی پەنجا بازنەکە لە سەرانسەری سووریادا ڕاگەیاند و ئاماژە بۆ ئەوەش دەکات بانگەشەی هەڵبژاردن لەئەمڕۆوە دەستپێدەکات.

وێنە گەورەکە: ئامادەکارییەکان بۆ هەڵبژاردنی داهاتووی پەرلەمانی سووریا دەستیانپێکردووە، ىڕیارە 2025-10-5، یەکەم پرۆسەی هەڵبژاردنی ئەنجوومەنی گەل لە سووریا بکرێت. ژمارەی کورسییەکانیش 210 کورسی دەبێت، 70 ئەندامیان لەلایەن ئەحمەد شەرعەوە دیاری دەکرێن.

لێدوانی فەرمی: محەممەد تەها ئەحمەد، سەرۆکی لیژنەی باڵای هەڵبژاردنەکانی ئەنجوومەنی گەلی سووریا بە میدیای وڵاتەکەی ڕاگەیاند، ژمارەی کاندیدەکان گەیشتووەتە هەزار و 578 کاندید و ڕێژەی ئافرەت لەنێویاندا گەیشتووەتە 14%، بە جیاوازی ئەم ڕێژەیە لە نێوان پارێزگایەک و یەکێکی دیکەدا.

زانیاریی زیاتر: بە گوتەی ئەحمەد، بانگەشەی هەڵبژاردن لە بەیانی ئەمڕۆوە دەستپێدەکات و ئێوارەی ڕۆژی هەینی کۆتایی دێت، بە مەرجێک ڕۆژی شەممە بۆ بێدەنگیی هەڵبژاردن تەرخان بکرێت.

ئەوەی پێشبینی دەکرێت: پرۆسەی دەنگدان بەیانی ڕۆژی یەکشەممە، 5ـی تشرینی یەکەم، لە کاتژمێر 9ـی بەیانییەوە بەڕێوەدەچێت، پاشان لە کاتژمێر 4ـی ئێوارەوە پرۆسەی جیاکردنەوەی دەنگەکان دەستپێدەکات.

ئەوەی پێویستە بیزانیت: بەگوێرەی دەستووری کاتیی سووریا، ماوەی قۆناغی ڕاگوزەر پێنج ساڵە، لەو ماوەیەدا پەرلەمانی نوێی سووریا لە کەسانی پسپۆڕ، شارەزا و نوێنەری پێکهاتە جیاوازەکان بەبێ هەڵبژاردن پێکدەهێنرێت، ئەرکی پەرلەمانە کاتییەکەش دەرچوواندنی یاسا، پەسەندکردنی بودجە و ڕێککەوتن و پەیماننامە نێودەوڵەتییەکان دەبێت.