لە عێراق لە ماوەی 72 کاتژمێر 21 بازرگانی نێوخۆیی و بیانی دەستگیر دەکرێن

ئاڤا نیوز

بەڕێوەبەرایەتیی گشتی کاروباری ماددە هۆشبەرەکان لە وەزارەتی ناوخۆی عێراق ڕایدەگەیێنێت لە ماوەی 72 کاتژمێری ڕابردوودا هێزەکانیان دەستیان بەسەر 50 کیلۆ ماددەی هۆشبەردا گرتووە و 21 بازرگانی ناوخۆیی و بیانیش دەستگیر کراون.

وێنە گەورەکە: بەدەر لە بەکارهێنەرانی؛ چەندین تۆڕی ناوخۆیی و نێودەوڵەتیی تایبەت بە ماددەی هۆشبەر و قاچاخچی لە عێراقدا چالاکن، بەپێی نوێترین ڕاپۆرتی نەتەوەیەکگرتووەکان کە لە ڕێگەیەوە هۆشداری دابوو، خەریکە عێراق دەبێتە ناوەندێک بۆ بڵاوبوونەوەی ماددە هۆشبەرەکان لە ناوچەکەدا.

ڕاگەیێنراوی فەرمی: بەگوێرەی ڕاگەیێنراوی بەڕێوەبەرایەتییەکە، "بەشی لێکۆڵینەوە تایبەتەکان لە بەڕێوبەرایەتییەکە، لە ماوەی 72 کاتژمێری ڕابردوودا، توانیویانە 50 کیلۆگرام لە جۆرە جیاوازەکانی ماددە هۆشبەرەکان دەستبەسەردا بگرن و 21 بازرگانی ناوخۆیی و بیانیش دەستگیر بکەن".

ئەوەی پێویستە بیزانیت: ڕۆژی 28ـی ئەیلوول بەڕێوەبەرایەتیی گشتی کاروباری ماددە هۆشبەرەکان ڕایگەیاندبوو، "تەنیا لە مانگی ئەیلوولی ئەمساڵدا دەستبەسەر 250 کیلۆگرام ماددە هۆشبەردا گیراوە، هاوکات 59 بازرگانی نێودەوڵەتی کە مەترسیدارترین بازنەکانی قاچاخچێتی و پەرەپێدان و بازرگانییان پێکدەهێنا، دەستگیر کراون".

ژمارەکان وادەڵێن: بەگوێرەی ئامارەکانی بەڕێوەبەرایەتییەکە، لەم مانگەدا دەست بەسەر 300 کیلۆگرام ماددە هۆشبەردا گیراوەو 80 بازرگانی ناوخۆیی و بیانیش دەستگیرکراون.