هێرشی حووسییەکان فڕۆکەخانەیەکی ئیسرائیل ناچار بە داخستن دەکات

ئاڤا نیوز

بەیانیی ئەمڕۆ، سوپای ئیسرائیل ڕایگەیاند، مووشەکێکی بالیستی لە یەمەنەوە هەڵدراوە و بەرپەرچدراوەتەوە، بەو هۆیەوە هاتووچۆی ئاسمانی لە فڕۆکەخانەی بن گوریۆن ڕاگیراوە. هاوکات حووسییەکان دووپاتیان کردەوە کە دوو هێرشیان کردووەتە ناوچە هەستیارییەکانی ئیسرائیل.

ڕاگەیێنراوی فەرمی: یەحیا سەریع، وتەبێژی گرووپی چەکداریی حووسییەکان ڕایگەیاند، ئۆپەراسیۆنی یەکەم بە مووشەکی بالیستیی هایپەرسۆنیکی "فەڵەستین 2" شوێنێکی هەستیاری ناوچەی "یافا"ـی کردە ئامانج، هاوکات ئۆپەراسیۆنی دووەم بە بەکارهێنانی دوو فڕۆکەی بێفڕۆکەوان دوو ناوچەی گرنگ لە "ئوم ڕەشڕاش" کراوەتە ئامانج.

لەلایەکی دیکەوە: سوپای ئیسرائیل ڕایگەیاندووە، "سیستمەکانی بەرگری ئاسمانی، هەڵدانی مووشەکێکیان لە یەمەنەوە دەستنیشانکردووە و بە سەرکەوتوویی بەرپەرچیان داوەتەوە"، ئاماژەی بەوەشکردووە، بەو هۆیەشەوە زەنگی ئاگادارکردنەوە لە چەند ناوچەیەکی ئیسرائیل لێدراوە.