ئێران کەسێک بە تۆمەتی "سیخوڕی" بۆ ئیسرائیل لە سێدارە دەدات

ئاڤا نیوز

دەسەڵاتدارانی ئێران کەسێکیان بە تۆمەتی سیخوڕیکردن بۆ ئیسرائیل لە سێدارەدا، دەگوترێت ئەو کەسە توانیویەتی دەستی بگاتە پڕۆژە هەستیار و داتابەیسی دەزگاکانی حکومەتی ئێران.

وێنە گەورەکە: لەسەروبەندی شەڕی 12 ڕۆژی نێوان ئیسرائیل و ئێران، لە ناوەڕاستی حوزەیرانی ئەمساڵ و دواتر، دەسەڵاتدارانی ئێران تاوەکو ئێستا دەیان کەسیان بە تۆمەتی سیخوڕی بۆ ئیسرائیل دەستگیر کردووە و ژمارەیەکیشان لە سێدارە دراون.

بڵاوکراوەی فەرمی: ئاژانسی "میزان"ـی هەواڵیی سەر بە دەسەڵاتی دادوەریی ئێران، ڕۆژی دووشەممە ڕایگەیاند، سزای لەسێدارەدان بەسەر یەکێک لە گرنگترین سیخوڕەکانی ئیسرائیل لە وڵاتدا جێبەجێ کرا.

زانیاریی زیاتر: بەگوێرەی ماڵپەڕەکە سیخوڕەکە ناوی "بەهمەن چوبی" بووە و پسپۆڕێکی بواری داتابەیس بووە، لە ڕێگەی کارکردنی لە کۆمپانیایەکی زانستییەوە، چووه‌تە ناو پڕۆژە هەستیارەکانی پەیوەندییە تەلەفۆنییەکانی وڵاتەوە.

لەلایەکی دیکەوە: بەگوێرەی هەواڵێکی ئاژانسی تەسنیم، "بەهمەن چوبی" لە کاتی خولێکی تایبەتمەندیدا لە یەکێک لە وڵاتانی کەنداو، لەلایەن کاربەدەستانی مۆسادەوە دەستنیشان کراوە. دواتر، لە ڕێگەی کۆمپانیایەکی ساختەوە پەیوەندی پێوە کراوە و دوای چەندین کۆبوونەوە لە وڵاتانی جیاوازدا و وەرگرتنی ڕاهێنانی تایبەتمەند، فەرمانی پێدراوە کە زانیاریی لە داتا بەیسەکانی دامودەزگا حکومییەکانی ئێران کۆبکاتەوە.