مووچەی مانگی حەوت خەرج کرا

ئاڤا نیوز

دوای ڕێککەوتنی نێوان هەولێر و بەغدا لەسەر پرسی داهاتی نانەوتی و هەناردەکردنەوەی نەوتی کوردستان، وەزارەتی دارایی عێراق بە یەک گوژمە بڕی 956 ملیار و 928 ملیۆن دیناری بۆ هەرێمی کوردستان خەرج کرد. 


وێنە گەورەکە: دوای ڕێکەوتنی نێوان هەولێر و بەغدا لەسەر هەناردەکردنەوەی نەوتی کوردستان بۆ بەندەری جیهان و ناردنی داهاتی نانەوتی بۆ بەغدا، خەرجکردنی مووچەی مانگی حەوت و مانگەکانی دواتر هیچ گرفت و بەربەستێکی لەبەردەمدا نەماوە، تەنها مانگانە جێبەجێکردنی ڕێکارە ئیدراییەکانی دەوێت لەنێوان وەزارەتی دارایی و بانکی ناوەندیی عێراق.


لێدوانی فەرمی: سەرچاوەیەک لە وەزارەتی دارایی کوردستان بە ئاڤای ڕاگەیاند، بانکی ناوەندیی عێراق بڕی 956 ملیار و 928 ملیۆن دیناری بە یەک گوژمە بۆ مووچەی مانگی حەوت خستە سەر هەژماری وەزارەتی دارایی و ئابووریی هەرێمی کوردستان لە لقی هەولێری بانکی ناوەندی.


ئەوەی پێویستە بیزانیت: لە چەند کاتژمێری داهاتوودا وەزارەتی دارایی کوردستان خشتەی دابەشکردنی مووچە بڵاو دەکاتەوە، سبەی چوارشەممە دابەشکردنی مووچە بە کاش دەستپێدەکات.

زانیاریی زیاتر: بەشێک لە پارەکە لە لقی هەولێری بانکی ناوەندی بۆ بانکەکانی هەژماری من دەنێردرێت، ئێوارەی ئەمڕۆ هەژماری من خشتەی مووچەی تایبەت بە خۆی بڵاودەکاتەوە و هەر ئەمشەو پارە دەخرێتە سەر هەژماری بەشێک لە مووچەخۆران. ئەم مانگە زیاتر لە 460 هەزار مووچەخۆر لەڕێگەی هەژماری من مووچە وەردەگرن.