حیزبوڵڵای عێراق بانگەشەی ئامادەکردنی 12 هەزار چەکداری ئوردنی بۆ پشتیوانیکردن لە غەززە دەکات

ئاڤا نیوز

 

کەتیبەکانی حیزبوڵڵای عێراق بانگەشەی ئامادەکردنی 12 هەزار چەکداری ئوردنی دەکەن، تاوەکو بە چەکی سووک و قورسەوە پشتیوانی لە چەکدارانی فەڵەستینی لە غەززە بکەن، بەڵام بەرپرسێکی عێراقی ئەو سیناریۆیە بەدوور دەزانێت.

 

وێنە گەورەکە: دوای دەستپێکردنەوەی خۆپێشاندانی فراوانی ئوردنییەکان لەبەردەم باڵیۆزخانەی ئیسرائیل لە عەممان، کەتائیبی حیزبوڵڵای عێراق بانگەشەی ئامادەکردنی 12 چەکداری ئوردنی دەکات بۆ پشتیوانی لە غەززە.

 

زانیاریی بەدەستهاتوو: بەرپرسێکی عێراقی بە ڕۆژنامەی شەرقولئەسەتی ڕاگەیاندووە، واقعەکە ڕێگە بەهیچ لایەنێکی عێراقی نادات گرووپی دەرەوەی وڵات پڕچەک بکات بۆ جموجوڵی گوماناوی، عێراق ڕێگە نادات بە پێشێلکردنی سەروەری هیچ وڵاتێکی دراوسێ، هیچ زانیارییەکی هەواڵگریش نییە ئەو دەنگۆیە بسەلمێنیت چ لەلایەن عێراق یان لایەنێکی هەرێمی یان نێودەوڵەتییەوە.

 

بۆچوونی لایەنی بەرامبەر: سەرچاوەیەکی حکومی ئوردنیش ڕایگەیاندووە، بەم دواییانە شکستیان بە چەندین هەوڵ و پلانی گرووپە چەکدارەکانی عێراق هێناوە، سوپای ئوردن توانای ئەوەی هەیە ڕووبەڕووی هەڕەشەی گرووپەکانی سەر بە ئێران ببێتەوە لە سنوورەکانی لەگەڵ سووریا و عێراق. هاوکات ئێرانیش تۆمەتبار دەکات بە هەوڵدان بۆ تێکدانی سەقامگیری ئوردن لەڕێگەی گرووپە هاوپەیمانەکانیەوە.