مانگی ڕابردوو چوار ئافرەت لە بەندیخانەکانی ئێران گیانیان لەدەستداوە

ئاڤا نیوز

مانگی ڕابردوو چوار ئافرەت لە بەندیخانەکانی ئێران گیانیان لەدەستداوە و ڕێکخراوێکی مافی مرۆڤیش ئاماری نۆ مانگی ڕابردوو بۆ ئاڤا ئاشکرا دەکات.

وێنە گەورەکە: وێرای هۆشداری و داواکاریی بەردەوامی ڕێکخراوەکانی مافی مرۆڤ لەسەر ئاستی جیهان، کەچی ڕێژەی لەسێدارەدان و گیانلەدەستدان لەنێو بەندیخانەکانی ئێران لەزیادبووندایە، دەیان کەسیش لە زیندانەکاندا و چارەنووسیان نادیارە. 

لێدوانی فەرمی: نەشمیل عابدی، ئەندامی ڕێکخراوی مافی مرۆڤی هەنگاو بە ئاڤای ڕاگەیاند: لە مانگی ڕابردوو چوار ئافرەت بەهۆی نەگەیشتنیان بە نەخۆشخانە لە بەندیخانەکانی ئێران گیانیان لەدەستداوە، دوایینیان سومەیە ڕەشیدی، بەندکراوی سیاسیی کورد بووە لە بەندیخانەی قەرچەکی شاری ورامین، کە 25 ئەیلوول گیانی لەدەستدا.

ژمارەکان وادەڵێن: ئەو ئافرەتانەی مانگی ڕابردوو لە بەندیخانە گیانیان لەدەستداوە ئەمانەن:

-سودابە ئەسەدی.
-سومەیە ڕەشیدی.
-جەمیلە عەزیزی.
-مەریەم شەهرکی

زانیاریی زیاتر: لە ماوەی نۆ مانگی رابردوو 40 ئافرەت لە بەندیخانەکانی ئێران گیانیان لەدەستداوە، لەو ژمارەیە 15 ئافرەتیان کورد بوون، بەشێکیان کۆتاییان بە ژیانی خۆیان هێناوە و بەشێکی دیکەش بەهۆی نەگەیشتنیان بە نەخۆشخانە گیانیان لەدەستداوە.