لەم چەند ڕۆژە کارەبای ئیدارەی سەربەخۆی سۆران دەبێتە 24 کاتژمێری

ئاڤا نیوز

ڕێکارەکانی جێبەجێکردنی کارەبای 24 کاتژمێری لە ئیدارەی سەربەخۆی سۆران تەواو کران، تەنیا چەند گوندێکی دوورە دەست ماون، ئەمڕۆ و بەیانی ئەوانیش تەواو دەکرێن. لە زاخۆش کارکردن بەردەوامە و لەماوەی ئاییندە دەگاتە قۆناغی کۆتایی.

وێنە گەورەکە: پڕۆژەی ڕووناکی یەکێکە لە پڕۆژە ستراتیژییەکانی حکومەتی هەرێمی کوردستان، پرۆژەکە ڕۆژی 2024-07-25 دەستیپێکرد، ئێستا نزیکەی چوار ملیۆن کەس لە کوردستان بوونەتە خاوەنی کارەبای 24 کاتژمێری، ئامانجەکە ئەوەیە تا ساڵی 2026 کارەبای تەواوی کوردستان ببێتە 24 کاتژمێری.

لێدوانی فەرمی: ئەردەوان ئیبراهیم، بەڕێوەبەری گشتیی کارەبای سۆران بە ئاڤای گوت، هەموو ڕێکارە هونەرییەکانی سەنتەری سۆران و قەزا و ناحییەکانی بە گوندەکانیشەوە تەواو کراون، لەم دوو ڕۆژە گرێبەستێکی شەش مانگی لەگەڵ خاوەن مۆلیدەکان دەکەین، بۆئەوەی لە هەر حاڵەتێکی دروستبوونی گرفت مۆلیدەکان کارەبا بدەنەوە هاونیشتمانیان.

لەلایەکی دیکەوە: ئەنوەر کربێت، بەڕێوەبەری گشتیی کارەبای زاخۆ؛ بە ئاڤای ڕاگەیاند، تیمەکانی پڕۆژەی ڕووناکی بەردەوامن لە کارکردن و لەئایندەیەکی نزیک دەگەنە قۆناغی کۆتایی پرۆسەکە، لە ماوەی داهاتوو کارەبای تەواوی ئیدارەی سەربەخۆی زاخۆ دەکرێت بە 24 کاتژمێری.

ئەوەی پێویستە بیزانیت: بەجێبەجێکردنی پرۆژەی ڕووناکی لەو دوو ئیدارەیە، 174 هەزار هاوبەش سوودمەند دەبن، 89 هەزار هاوبەش لە سۆران و 85 هەزار هاوبەش لە زاخۆ.