ئێران: ڕێگای دانوستان لەگەڵ ئەمریکا داخراوە

ئاڤا نیوز

سزا سەپێنراوەکانی سەر ئێران بووەتە ڕێگر لەبەردەم دەستکردن بە دانوستانەکانی تاران لەگەڵ ئەمریکا و ئەوروپا، وەزیری دەرەوەی ئێرانیش ئاشکرای دەکات، 'ڕێگای دانوستان لەگەڵ ئەمریکا بەتەواوی داخراوە'.

لێدوانی فەرمی: عەباس عێراقچی، وەزیری دەرەوەی ئێران ڕایگەیاند، پەیاممان لەگەڵ ئەمریکا ئاڵۆگۆڕکرد بەشێوەیەکی ڕاستەوخۆ و ناڕاستەوخۆ و دڵنیابووین کە دانوستان لەگەڵ ئەواندا بەتەواوی داخراوە، پێشنیازەکانی ئێمە بۆ چارەسەری دیپلۆماسی دادپەروەرانە بوون، بەڵام واشنتن و سێ وڵاتی ئەوروپی ڕەتیانکردەوە. 

-دووپاتیکردەوە، تاران هیچ ڕێککەوتنێک قبوڵ ناکات کە بەرژەوەندی گەلی ئێران نەپارێزێت.

لەلایەکی دیکەوە: مەسعود پزیشکیان، سەرۆککۆماری ئێران لە چاوپێکەوتنێکدا لەگەڵ کەناڵی ئێن بی سی نیوزی، ئەمریکی لەبارەی ئەنجامدانی دانوستان لەگەڵ ئەمریکا و وڵاتانی ئەوروپا وتی، ئێران ئامادەیە بۆ دانیشتن بەڵام بەمەرجی هەڵگرتنی سزاکانی سەر وڵاتەکە.

بەتەنیشت ئەم بابەتەوە: ڕۆژنامەی نیویۆرک تایمزـی ئەمریکی لە ڕاپۆرتێکدا ڕایگەیاند، ئیدارەی ئەمریکا نزیکەی 100 ئێرانی لە ئەمریکاوە بۆ تاران گواستەوە.