سەرۆک بارزانی: خەڵکی کوردستان بە دڵ بڕوایان بە تەبایی و پێکەوەژیان هەیە

ئاڤا نیوز

سەرۆک بارزانی پێشوازیی لە شاندێکی کەنیسەی ئەرتۆدۆکسی ڕووسیا کرد و ئاماژەی بەوەدا كە خەڵكی كوردستان بە دڵ و قەناعەتەوە بڕوایان بە تەبایی و پێكەوەژیان هەیە.

چیرۆکی سەرەکی: ڕۆژی سێشەممە 30-9-2025، سەرۆک مەسعود بارزانی لە پیرمام پێشوازیی لە شاندێكی كەنیسەی ئەرتۆدۆكسی ڕووسیا بە سەرۆكایەتیی مەتران ئەنتۆنی، بەرپرسی پەیوەندییەكانی دەرەوەی كەنیسەی ئەرتۆدۆكسی ڕووسیا كرد.

ڕاگەیێنراوی فەرمی: بارەگای بارزانی بڵاویکردەوە، لە دیدارەكەدا ماكسیم ڕۆبین، كونسوڵی گشتیی ڕووسیا لە هەولێر ئامادەی بوو، شاندی كەنیسەی ئەرتۆدۆكسی ڕووسیا وێڕای دەربڕینی خۆشحاڵیی خۆیان بۆ سەردانیان بۆ كوردستان، پێزانینیان بۆ ڕۆڵی سەرۆك بارزانی هەبوو لە قووڵكردنەوەی پێكەوەژیان و ئەو ئاشتی و تەباییەی نێوان پێكهاتە ئایینی و نەتەوەییەكانی كوردستاندا هەیە. ئەوەشیان دووپاتكردەوە بە بایەخێكی زۆرەوە سەیری هەرێمی كوردستان دەكەن كە لە ناوچەیەكدا هەڵكەوتووە سەرچاوەی مرۆڤایەتییە و بڕوای قووڵی بە پێكەوەژیان هەیە. شاندەکە خوازیاری ئەوە بوون پەیوەندییەكانیان لەگەڵ هەموو ناوەندە ئایینیەكانی كوردستان بەردەوام بێت و بەرەو پێشەوە بچێت.

پەیامی فەرمی: لە دیدارەکەدا سەرۆك بارزانی جەختی لە پەیوەندی و دۆستایەتیی دێرینی نێوان گەلی كوردستان و گەلی ڕووسیا كردەوە. باسی لە چەند نموونەیەكی مێژوویی وەفا و پێكەوەیی پێكهاتەكانی كوردستان كرد بەرانبەر یەكتر لەكاتە سەختەكاندا، ئاماژەی بەوەدا كە خەڵكی كوردستان لە دڵ و بە قەناعەتەوە بڕوایان بە تەبایی و پێكەوەژیان هەیە، ئەوە بووەتە فەرهەنگێكی بەهێز و ڕیشەی لە مێژوودا هەیە، کە بۆ نەوەكانی ئایندەش دەمێنێتەوە.