شاندی کوردستان بۆ پرسی خانەنشینی پێشمەرگە لە بەغداوە گەڕانەوە هەولێر

ئاڤا نیوز

 

ئەمڕۆ سێشەممە شاندی هەرێمی کوردستان  بۆ چارەسەرکردنی کێشەی خانەنشینانی پێشمەرگە لە بەغدا یەکەم کۆبوونەوەی لەگەڵ دەستەی خانەنشینی عێراق کرد.

 

وێنە گەورەکە: وەزارەتی دارایی عێراق داوای کردووە پێشمەرگە بە یاسای خانەنشینی یەکگرتووی ساڵی 2014ـی عێراق خانەنشین بکرێن، بەپێی ئەو یاسایەش، بڕوانامە و کۆمەڵێک ئیمتیازاتی پێشمەرگە و پلەدارەکان هەژمار ناکرێن و مووچەکانیان کەم دەبێتەوە، حکومەتی کوردستان داوا دەکات بە یاساکانی پەرلەمانی کوردستان خانەنشین بکرێن.

ئەوەی پێویستە بیزانیت: حاجی مەلا ئەمین، بەڕێوەبەری گشتیی خانەنشینی پێشمەرگە سەرۆکایەتی شاندەکە دەکات، لە وەزارەتی دارایی و بەڕێوەبەرایەتیی گشتیی خانەنشینیش شەش کەس یاوەری دەکەن.

هۆکارە زانراوەکان: ئامانج لە سەردانەکە بۆ ئەوە بووە میکانیزمێکی گونجاو بۆ خانەنشینکردنی پێشمەرگە و پلەدارەکان بدۆزنەوە، کێشەی ئەو پێشمەرگانەش چارەسەر بکرێت کە خانەنشین کراون.

زانیاریی ئاڤا: ئاڤا زانیویەتی لە کۆبوونەوەی ئەمڕۆ هیچ بڕیارێک نەدراوە ئایا بە یاسای خانەنشینی یەکگرتووی عێراق خانەنشین بکرێن یان بە یاساکانی پەرلەمانی کوردستان، بۆیە بڕیاریان داوە بگەڕێنەوە هەولێر.

لە کۆبوونەوەی ئەمڕۆ دەستەی خانەنشینی عێراق بۆچوونی خۆیان پێشنیاز کردووە، پێویست دەکات لە هەولێر گفتوگۆی لەسەر بکرێت ئینجا شاندەکە بچێتەوە بەغدا و گفتوگۆی لەسەر بکەنەوە.