لەسەر داوای وەزارەتی دارایی خەرجی وەزارەتەکان کەم دەکرێتەوە

ئاڤا نیوز

 

بڕیارە لە کۆبوونەوەی سبەی چوارشەممە ئەنجوومەنی وەزیرانی کوردستان چەند پرسێکی تایبەت بە خەرجی و پێشینەی وەزارەتەکان و داهاتی نانەوتی بخاتە ڕوو.

 

وێنە گەورەکە: ڕۆژی 1-10-2025، بە سەرپەرشتی سەرۆکوەزیران مەسرور بارزانی ئەنجوومەنی وەزیرانی هەرێمی کوردستان کۆدەبێتەوە، سێ بڕگە لە کۆبوونەوەکەدا تاوتوێ دەکرێت.

 

زانیاریی تایبەت: سەرچاوەیەک لە وەزارەتی دارایی و ئابووری بە ئاڤا میدیای ڕاگەیاند: لە کۆبوونەوەی سبەی ئەنجوومەنی وەزیران، پرسی داهاتی نانەوتی بە دابەش دوو، واتە 50٪ بۆ حکومەتی فیدراڵ و 50٪ بۆ حکومەتی هەرێم گفتوگۆی لەسەر دەکرێت، ئەمەش بەشێک دەبێت لە درێژەپێدەری کۆبوونەوەکانی پێشتر.

 

سەرچاوەکەی وەزارەتی دارایی و ئابووری دەڵێت، ئێمە کەمێک کێشەمان لە خەرجییەکان هەیە، بۆیە پرسی کەم کردنەوەی خەرجییەکان و پێشینەی وەزارەتەکان دەخرێتە ڕوو، هەندێک فەرمانگە و لقمان هەیە لە ماوەی داهاتوودا یەکدەگرنەوە، بە نموونە بەڕێوەبەرایەتیی ئەوقافی هەولێر و بەڕێوەبەرایەتی ئەوقافی دەوروبەری هەولێر دوو وەحدەی حسابین بۆیە خەرجی و نەسریەیان کەم دەکرێتەوە.

 

لەلایەکی دیکە: هاوکات ئەو سەرچاوەیە گوتی، سەبارەت بە پۆلێنکردنی داهات، ئەمە داهاتی سنوورەکان و فڕۆکەخانە و زەریبە و ڕسوومات و شارەوانییەکان و هاتووچۆ دەگرێتەوە و پۆلێن دەکرێنەوە، پێشتر بەشێک لە داهاتەکە بەو شوێنانە دەدرایەوە، بۆیە پێداچوونەوە بە نیسبەکان دەکرێتەوە.

 

هەنگاوی دواتر: دوای ئەوەی لەلایەن ئەنجوومەنی وەزیران دەکرێتە فەرمان، ئەوا دەکرێت بە کۆنووس و گشتاندن بۆ وەزارەتەکان دەکرێت، هەروەها دەکرێت بە بڕیار و بڕیارەکەش دەکرێت بە ڕاسپاردە.