دەست بە دابەشکردنی مووچەی مانگی حەوت دەکرێت

ئاڤا نیوز

ئەمڕۆ وەزارەتی دارایی هەرێمی کوردستان پارەی مووچەی مانگی حەوت وەردەگرێت و بەسەر بانکەکاندا دابەشی دەکات. وەزارەتی دارایی کوردستان دەڵێت، دوای وەرگرتنی پارەکە دەستبەجێ خشتەی مووچە ڕادەگەیێنن.

 

چیرۆکی سەرەکی: ڕۆژی سێشەممە 30-09-2025، بانکی ناوەندیی عێراق بڕی 956 ملیار و 928 ملیۆن دیناری بە یەک گوژمە بۆ مووچەی مانگی حەوت خستە سەر هەژماری وەزارەتی دارایی و ئابووریی هەرێمی کوردستان لە لقی هەولێری بانکی ناوەندی، بەڵام بەهۆی ئەوەی پرۆسەکە دوای دەوامی فەرمی بوو وەزارەتی دارایی هەرێمی کوردستان فریا نەکەوت پارەکە وەرگرێت، ئەمڕۆ وەریدەگرێت.

 

لێدوانی فەرمی: سەرچاوەیەک لە لقی هەولێری بانکی ناوەندیی عێراق بە ئاڤای گوت، "پێشنیوەڕۆی ئەمڕۆ چوارشەممە وەزارەتی دارایی هەرێمی کوردستان پارەکە بەشێوەی کاش وەردەگرن."

 

ئەمەش بزانە: دوای وەرگرتنی پارەکە وەزارەتی دارایی هەرێمی کوردستان خشتەی دابەشکردنی مووچە بڵاودەکاتەوە.

 

-خشتەی دابەشکردنی مووچەش هاوشێوەی مانگی ڕابردووە، بە خانەنشینیانی شارستانی، خاوەن پێداویستییە تایبەتەکان، زیندانیانی سیاسی، بەركەوتووانی چەكی كیمیایی و كەسوكاری شەهیدان دەست پێ دەکات.

-ڕۆژی سێیەم بە ژمارەیەک وەزارەت، سێ سەرۆکایەتییەکە، ئەنجوومەنی ئاسایش و زێرەڤانی و پۆلیسی بەرگری و فریاکەوتن کۆتایی دێت.

 

لەلایەکی دیکە: تیمی  (هەژماری من) بە ئاڤای ڕاگەیاند، ئەمڕۆ چوارشەممە مووچەی خانەنشینان، وەزارەتەکانی پەروەردە، تەندروستی و خوێندنی باڵا، لە ڕێگەی (هەژماری من) دابەش دەکرێت کە ژمارەیان 170 هەزار مووچەخۆرە..