کاروانی دووەمی نەخۆشانی تالاسیما بۆ چاندنی مۆخی ئێسک ڕەوانەی دەرەوە کران

ئاڤا نیوز

 

بە فەرمانی سەرۆکوەزیران مەسرور بارزانی، کاروانی دووەمی نەخۆشانی تالاسیما بۆ چاندنی مۆخی ئێسک ڕەوانەی دەرەوەی وڵات کران.

 

ڕاگەیێنراوی فەرمی: وەزارەتی تەندروستیی حکومەتی هەرێمی کوردستان ڕایگەیاند: بەرەبەیانیی ئەمڕۆ 1-10-2025، لەسەر فەرمانی سەرۆکوەزیران مەسرور بارزانی، 40 نەخۆشی تالاسیما و بەخشەران و هاوەڵەکانیان بۆ نەشتەرگەری چاندنی مۆخی ئێسک لەڕێگەی فڕۆکەخانەی نێودەوڵەتیی هەولێرەوە ڕەوانەی دەرەوە کران.

 

لە ڕاگەیێنراوەکەدا هاتووە، هەموو خەرجییەکانی چوون، مانەوە، پشکنین، نەشتەرگەری، چارەسەرەکان و هاتنەوەی ئەو 40 کەسە، لەسەر بودجەی پێویستی دابینکراوە، کە بۆ 140 تووشبووی  تالاسیما و ئەنجامدانی نەشتەرگەری چاندنی مۆخی ئێسک جێبەجێ دەکرێت.

 

زانیاری زیاتر: نزیکەی 11 ملیار دینار بۆ نەخۆشانی خاوەن بەخشەر و نەخۆشانی نەبوونی بەخشەر دابین کراوە.

 

ئەوەی پێویستە بیزانیت: ئێستا 72 هاووڵاتی لە نەخۆشخانەکانی دەرەوەن، لە ڕۆژانی داهاتوودا کاروانی سێیەمی نەخۆشانی تالاسیما بۆ چارەسەر ڕەوانەی دەرەوە دەکرێن.