ئەردۆغان: تورکیا گەورەترین و متمانەپێکراوترین پارێزەری کوردە

ئاڤا نیوز

سەرۆککۆماری تورکیا ڕایدەگەیێنێت وڵاتەکەی گەورەترین، متمانەپێکراوترین و سەرڕاستترین پارێزەری کوردانی دەرەوەی تورکیایە و دەڵێت: "ڕێگەگرتن لە دابەشکردنی سووریا، لە بەرژەوەندیی کوردانی ئەو وڵاتەیە".

چیرۆکی سەرەکی: ڕۆژی چوارشەممە 2025-10-01 لە دوای کردنەوەی وەرزی نوێی یاسادان لە پەرلەمانی تورکیا، ئەردۆغان گوتارێکی پێشکەش کرد و ئاماژەی بەوە دا پرۆسەی ئاشتی و چەکدانانی پەکەکە هەنگاوی باشی بڕیووە و سوپاسی دەستپێشخەرییەکەی دەوڵەت باخچەلی، سەرۆکی گشتیی مەهەپە و هەوڵەکانی دەم پارتی کرد بۆ بەرەوپێشچوونی پرۆسەکە و باسی لەو کۆمیسیۆنەش کرد کە بۆ ئەم مەبەستە لە پەرلەمان پێکهێنراوە.

لێدوانی فەرمی: ڕەجەب تەیب ئەردۆغان، سەرۆککۆماری تورکیا دەڵێت: "تورکیا وەک چۆن نیشتمانی دایکی کوردانی تورکیایە، بە هەمان شێوە گەورەترین، متمانەپێکراوترین و سەرڕاستترین پارێزەر و برای کوردانی دەرەوەی تورکیاشە. یەکەم پەناگەیشە کە لەم دواییانەدا یەکەمجار لەلایەن کوردانەوە لە دەرگای دەدرێت. وەک چۆن سەدان ساڵە بەم جۆرە بووە ئەمڕۆ و سبەیش تورکیا هەر بەم جۆرە دەمێنێتەوە بۆ کورد".

ئەردۆغان باسی لەوە کرد کە وەک کورد، تورک، عەرەب، سوننە، عەلەوی بەبێ جیاکاری و جیاوازی نەتەوە و زمان و ئایین سەرجەمیان ڕێبواری داهاتوویەکی هاوبەشن و دەڵێت: "خوا یار بێت تەواوی ئەو بەربەستانە لەناو دەبەین کە لە بەردەم برایەتیی هەمیشەییمان دروست دەبێت. کاتێک تورک، کورد و عەرەب یەکگرتوو و یەکڕیز بن، تەواوی ئەو کێشانە چارەسەر دەکەن کە لە ناوچەکە هەن و ئارامی و ئاشتیی یەکجارەکی باڵ بەسەر ناوچەکەدا دەکێشێت".

ئەوەی پێویستە بزانیت: هەر لە گوتارەکەیدا ئەردۆغان وتی "بەتووندترین شێوە دژی پیلانی دابەشکردنی سووریا دەوەستینەوە، ئەمەش دژی برا کوردەکانمان نییە لە سووریا، بەڵکوو لە بەرژەوەندیی ئەواندایە".