نەتەوەیەکگرتووەکان: ئیسرائیل بە تێکڕا ڕۆژانە 100 کەس لە غەززە دەکوژێت

ئاڤا نیوز

ڕێکخراوی "ئۆنروا" ئاشکرای دەکات، ئیسرائیل بە تێكڕا ڕۆژانە 100 هاووڵاتیی فەڵەستینی لە کەرتی غەززە دەکوژێت و داوا لە کۆمەڵگەی نێودەوڵەتی دەکات لێپرسینەوە لەگەڵ تۆمەتباران بکات.

وێنە گەورەکە: سەرەڕای پێشنیازەکەی دۆناڵد ترەمپ، سەرۆکی ئەمریکا سەبارەت بە ئاگربەست لە کەرتی غەززە و ڕەزامەندیی ئیسرائیل لەسەری، سوپای ئەو وڵاتە بەردەوامە لە ئۆپەراسیۆنە سەربازی و ئاسمانییەکان و گەمارۆدانی کەرتەکە کە بەهۆیەوە ڕۆژانە دەیان هاووڵاتی فەڵەستینی کە زۆربەیان منداڵ و ژنن گیانلەدەستدەدەن.

لێدوانی فەرمی: فیلیپ لازارینی، ڕاسپێردراوی گشتیی ئاژانسی هاوکاری و بەکارخستنی پەنابەرانی فەڵەستینیی سەر بە نەتەوەیەکگرتووەکان ڕایگەیاند: بە تێکڕا ڕۆژانە 100 کەس لە غەززە دەکوژرێن، ئەمەش لە ئەنجامی ئۆپەراسیۆنی سەربازی ئیسرائیل یان تەقەکردن لە خاڵەکانی دابەشکردنی خۆراکی دەزگای مرۆیی، لە هەمان کاتدا، کەسانی دیکە بەهۆی برسێتی یان نەبوونی چاودێری پزیشکییەوە دەمرن.

لازارینی جەختی لەوە کردەوە، "دەبێت تاوانەکان بەردەوام بە بەڵگەنامە بکرێن، ئازارەکانی ببیسترێن و گرنگییان پێبدرێت"، داوای خۆی بۆ ئاگربەست و لێپرسینەوە لە بەرپرسانی تاوانەکانی ئەنجامدراو و بەدیهاتنی دادپەروەری دووپاتکردەوە.

ئەوەی پێویستە بیزانیت: لە دەرەوەی چاودێری نەتەوەیەکگرتووەکان و ڕێکخراوە نێودەوڵەتییەکانی فریاگوزاری، تەلئەبیب لە 27ـی ئایارەوە لە ڕێگەی دامەزراوەی "فریاگوزاری مرۆیی غەززەوە" میکانیزمی دابەشکردنی یارمەتییەکان جێبەجێ دەکات کە فەڵەستینییەکان بە "تەڵەی مردن" ناوی دەبەن.