سیستمێکی بەرگریی چین هاوکێشەکان لە جیهان دەگۆڕێت و لە یەک کاتدا هەزار ئامانج دەپێکێت

ئاڤا نیوز

لە کاتێکدا تا دێت کێبڕکێی وڵاتان لە بواری پیشەسازیی بەرگری و بەتایبەتیش سیستمی بەرگریی مووشەکی تووندتر دەبێت، چین جۆرە سیستمێک دروست دەکات هاوکێشەکان لە جیهان دەگۆڕێت و لە یەک کاتدا هەزار ئامانج دەپێکێت.

وێنە گەورەکە: سوپای چین بە سەرکەوتوویی نموونەی بەرایی سیستمی بەرگریی موشەکیی جیهانی تاقیکردەوە کە دەتوانێت لە یەک کاتدا هەزار مووشەکی بالستیکی ئاراستە بکات.

لە ڕێگای ئەم سیستمەوە زانیارییەکان لە وشکانی، دەریا، ئاسمان و بۆشایی ئاسمان کۆ دەکرێنەوە، یەک دەخرێن و بە جۆرێک هەڵدەسەنگێنرێن کە کەی دەبنە هۆی مەترسیی ڕاستەقینە. سیستمەکە توانای لێکجیاکردنەوەی ئامانجی ڕاستەقینە و ئامانجی ساختەشی هەیە.

لێدوانی فەرمی: بەرپرسە سەربازییەکانی چین سیستمەکە بە "پلاتفۆرمی دیاریکردن و هۆشداریدانی پێشوەختەی پشتبەستوو بە زانیاریی زۆر و پەرشوبڵاو" ناو دەبەن. باس لەوەش دەکەن تەواوی ئەو زانیارییانەی لە ڕێگای ڕادار، مانگی دەستکرد، ئامێرە هەستەوەرەکانی ڕووناکی و دەستنیشانکردن بە دەست دەهێندرێن، لە تۆڕێکدا کۆ دەکرێنەوە و کاریان لەسەر دەکرێت.

شارەزایانی بەرگریی ئاماژە بەوە دەدەن گرنگترین خاڵی ئەم پلاتفۆرمە لەوەدایە ئەو زانیارییە پەرشوبڵاوانە لە یەک تۆڕدا کۆدەکاتەوە و بە گونجاندن لەگەڵ هۆشداریدانەکانی دیکە، دەتوانرێت لە یەک کاتدا زیاتر لە هەزار ئامانج بپێکرێت.

ئەوەی پێویستە بیزانیت: لە ڕێگای پڕۆتۆکۆڵی QUIC تەنانەت ئەگەر دووچاری تێکەڵبوونی ئەلیکترۆنی قورسیش ببێتەوە، دەتوانرێت بە خێرایی و بەبێ کێشە زانیارییەکان بۆ سیستەمەکە بگوازرێنەوە.