لەبارەی جووڵەی فڕۆکەوانی جەنگی لە ئاسمانی بەغدا ڕوونکردنەوە دەدرێت

ئاڤا نیوز

فەرماندەیی ئۆپەراسیۆنە هاوبەشەکان، لە ڕێگەی شانەی ڕاگەیاندنی ئەمنییەوە ڕایدەگەیێنێت، جووڵەی فڕۆکەوانی لە ئاسمانی بەغدای پایتەخت بۆ ماوەی سێ ڕۆژ چڕ دەبێتەوە، ڕوونیشی دەکاتەوە ئەمە "لە چوارچێوەی ڕاهێنانە ئامادەکارییەکانە بۆ نمایشی ڕۆژی نیشتمانیی عێراق"

ئەوەی پێویستە بیزانیت: عێراق ساڵانە لە 3ـی 10، ڕۆژی نیشتمانی خۆی پیرۆز دەکات و بەو بۆنەیەشەوە چەندین چالاکیی جۆراوجۆر بە دیاریکراویش لە بەغدای پایتەخت بەڕێوەدەچن.

ڕاگەیێنراوی فەرمی: بەگوێرەی ڕاگەیێنراوی شانەی ڕاگەیاندنی ئەمنی، "بەبۆنەی ڕۆژی نیشتمانیی عێراقەوە، فەرماندەیی هێزی ئاسمانی و فڕۆکەوانی سوپا، ئامادەکاری بۆ ئەنجامدانی نماییشێکی ئاسمانی ناوازە لە ئاسمانی پایتەخت دەکات، ئەمەش لە چوارچێوەی ئاهەنگەکانی وڵات بەم ڕۆژە نیشتمانییە پڕشکۆیە کە دەکەوێتە ڕۆژی هەینی 3ـی 10."

لەهەمان کاتدا: شانەکە ئاماژە بۆ ئەوە دەکات، "جووڵەی فڕۆکەوانی کە لە ئاسمانی بەغدا لە ماوەی سێ ڕۆژی داهاتوودا بەدی دەکرێت کە لەلایەن هێزی ئاسمانی و فڕۆکەوانی سوپاوە ئەنجام دەدرێن بۆ ئەو نماییشە ئاسمانییەی کە بەم بۆنەیە ئەنجام دەدرێت".