هەفتەی داهاتوو جووتیارانی سنووری هەولێر شایستە داراییەکانیان وەردەگرن

ئاڤا نیوز

پرۆسەی دابەشکردنی شایستە داراییەکانی جووتیاران لە سنووری هەولێر دەست پێدەکات، ڕۆژانە چەکی پارەی جووتیاران خەرج دەکرێت لەماوەی چەند ڕۆژێک سەرجەم ئەو جووتیارانەی لە قۆناغی یەکەم گەنمیان ڕادەستکردووە پارەکانیان وەردەگرن.

وێنە گەورەکە: بەغدا 57 ملیار دیناری بۆ شایستە داراییەکانی جووتیاران خەرجکردووە، لەسنووری سلێمانی و هەڵەبجە دەست بە دابەشکردنی پارەکە کراوە، بەڵام بەهۆی ئەوەی بانکی TBI ناتوانێت بڕی پێویست ڕۆژانە بۆ جووتیارانی هەولێر و دهۆک دابین بکات پرۆسەکە دواکەوت.

لێدوانی فەرمی: هێمن سەید موراد، بەڕێوەبەری گشتیی کشتوکاڵی هەولێر بە ئاڤای گوت، "ڕۆژی یەکشەممەی داهاتوو دەست بە دابەشکردنی شایستە داراییەکانی جووتیاران دەکرێت، ڕۆژانە 100 جووتیار پارەکە وەردەگرن و لەچەند ڕۆژێکدا سەرجەم ئەو جووتیارانەی لە قۆناغی یەکەم گەنمیان ڕادەست کردووە چەکەکانیان خەرج دەکرێت."

لەلایەکی دیکەوە: نازم ئەتروشی، بەڕێوەبەری بەبازاڕکردنی گەنمی دهۆک؛ بە ئاڤای ڕاگەیاند، "تاوەکو ئێستا چەکی خەرجکردنی شایستە داراییەکانمان بەدەست نەگەیشتووە، دیار نییە چ كاتێك پارەکە خەرج دەکرێت."