لە دهۆک ڕێنمایی بۆ بانگەشەی هەڵبژاردن دەردەکرێت

ئاڤا نیوز

ئۆفیسی دهۆکی کۆمسیۆنی باڵای سەربەخۆی هەڵبژاردنەکانی عێراق، ژمارەیەک ڕێنمایی نوێی بۆ بانگەشە دەرکردووە، 41 لیژنەشی بۆ چاودێری کردنی بانگەشە پێکهێناوە.

وێنە گەورەکە: بەرەبەیانی ڕۆژی هەینی، 2025-10-03 بانگەشە بۆ هەڵبژاردنی پەرلەمانی عێراق دەست پێدەکات و تا 2025-11-08 بەردەوام دەبێت، کۆمسیۆن ڕێنمایی و شێوازی بانگەشەی دیاری کردووە، لەهەر بازنەیەکی هەڵبژاردنیش لە چوارچێوەی ڕێنماییەکانی کۆمسیۆن ڕێنمایی تایبەت و ڕێکاری پێویستە دەگرنەبەر.

لێدوانی فەرمی:  خالید عەباس، بەرپرسی ئۆفیسی دهۆکی کۆمسیۆنی باڵای سەربەخۆی هەڵبژاردنەکانی عێراق لە کۆنگرەیەکی ڕۆژنامەوانیدا گوتی: زۆربەی ڕێکار و ئامادەکارییەکانمان بۆ هەڵبژاردن تەواو کردووە، بە هەماهەنگی شارەوانی ڕێنمایی تایبەتمان بۆ بانگەشە دەرکردووە و دەبێت هەموو لیست و بەربژێران شوێنی دانانی پۆستەرەکانی بانگەشەیان لەلایەن شارەوانی بۆ دیاری بکرێت.

بۆ چاودێری کردنی بانگەشەی هەڵبژاردن 41 لیژنەمان لەسەرتاسەری بازنەی دهۆک پێکهێناوە.

خالید عەباس ئەمانەشی گوت:

٠ نابێت شۆستە و شەقام بۆ بانگەشەی هەڵبژاردن بەکاربهێنرێت کە ببێتە هۆی ڕێگری لە هاتووچۆی پیادە و ئۆتۆمبێل.

٠ نابێت لە بانگەشە تەشهیر و ناوزڕاندن بەکاربهێنرێت.

٠ نابێت فەرمانبەرانی حکومەت و کارمەندانی کۆمسیۆن و هێزە ئەمنییەکان بۆ بانگەشە بەکاربهێنرێن.

٠ نابێت هێمای دەوڵەتی فیدراڵ و هەرێمی کوردستان بۆ بانگەشە بەکاربهێنرێن.

٠ نابێت بۆ بانگەشە سەردانی دامەزراوەکانی فەرمی حکومەت، مزگەوت و کەنیسە و شوێنە ئاینییەکان بکرێت.

ژمارەکان وادەڵێن: لە سنووری بازنەی دهۆک ژمارەی دەنگدەران و بنکەکانی دەنگدان و بەربژێران بەمجۆرەیە:

٠ کۆی گشتیی دەنگدەرانی دهۆک: 779 هەزار دەنگدەر

٠ ژمارەی دەنگدەرانی دەنگدانی گشتی : 722 هەزار دەنگدەر

٠ ژمارەی بنکەکانی دەنگدانی گشتی : 278 بنکە

٠ ژمارەی دەنگدەرانی تایبەت : زیاتر لە 56 هەزار دەنگدەر

٠ ژمارەی بنکەکانی دەنگدانی تایبەت : 43 بنکە

٠ ژمارەی ئەو ئاوارانەی لە پارێزگای دهۆک دەنگدەدەن: زیاتر لە 25 هەزار دەنگدەر

٠ ژمارەی بنکەکانی تایبەت بە ئاوارەکان : 22 بنکە

٠ ژمارەی بەربژێرانی پارێزگای دهۆک : 59 بەربژێر

٠ بەربژێری پیاو: 39 بەربژێر

٠ بەربژێری ئافرەت: 20 بەربژێر

٠ ژمارەی کورسی: 11 کورسی (هەشت پیاو و سێ ئافرەت)

٠ ژمارەی کورسی کۆتا: یەک کورسی کۆتای کریستیان

بەتەنیشت ئەم بابەتەوە: 90 هەزار کەس بەمەبەستی تۆمارکردنی نوێ و نوێکردنەوە و ڕاستکردنەوەی تۆمارەکان سەردانی بنکەکانی نوێکردنەوەی تۆماری دەنگدەرانیان کردووە، لەو ژمارەیە 85 هەزار کارتی نوێ گەڕاوەتەوە.