کۆڵبەرێکی کورد بە تەقەی پاسەوانی سنووری ئێران گیانی لەدەست دا

ئاڤا نیوز

کۆڵبەرێکی کورد لە سنووری بانەی ڕۆژهەڵاتی کوردستان بە گوللە دەکرێتە ئامانج و دەستبەجێ گیانلەدەستدەدات.

چیرۆکی سەرەکی: کۆڵبەرێکی خەڵکی بانە بە ناوی ڕێبوار موحەممەدزادە، لە کاتی کۆڵبەری لە بەرزاییەکانی سنووری سوورکێوی بانە، بە تەقەی ڕاستەوخۆی هێزەکانی پاسەوانی سنووریی کۆماری ئیسلامیی ئێران کوژرا.

لێدوانی فەرمی: نەشمیل عابدی، ئەندامی ڕێکخراوی مافی مرۆڤی هەنگاو بە ئاڤای ڕاگەیاند: کۆڵبەرەکە خەڵکی گوندی سپیداری بانەیە و تەمەن 38 ساڵە، لە کاتی کۆڵبەریدا بە تەقەی ڕاستەوخۆی هێزە چەکدارەکانی کۆماری ئیسلامیی ئێران گیانی لەدەست دا.

زانیاریی زیاتر: بەوتەی سەرچاوەیەکی ئاگادار، ڕێبوار موحەممەدزادە، خێزاندارە و باوکی دوو منداڵە، بە گوللە کراوەتە ئامانج و دەستبەجێ گیانی لەدەست داوە.

ئەوەی پێویستە بیزانیت: بەگوێرەی ئەو ئامارانەی دەست ئاڤا میدیا کەوتوون، لە ماوەی 10 مانگی ڕابردوو 46 کۆلبەری کورد بوونەتە ئامانجی هێزەکانی پاسەوانی سنووریی ئێران، کە 20 کۆڵبەریان گیانیان لەدەست داوە و 26 ـی دیکەشیان بریندار بوونە.