نەوت گەیشتووەتە کۆگاکان و لەداهاتویێکی نزیک لە ناوچە شاخاوییەکان دابەش دەکرێت

ئاڤا نیوز

ئامادەکاری بۆ دابەشکردنی نەوتی سپی بەردەوامە و نەوت گەیشتووەتە کۆگاکان و لە داهاتویێکی نزیک لە ناوچە شاخاوییەکان پرۆسەکە دەست پێدەکات.

وێنە گەورەکە: ئەمساڵ کار بۆ ئەوە دەکرێت، زووتر لە ساڵانی ڕابردوو نەوتی سپی بەسەر هاونیشتمانیان دابەش بکرێت، بۆ ئەم مەبەستەش ئامادەکارییەکان بۆ ئەم پرۆسەیە کراوە.

زانیاریی بەدەستهاتوو: سەرچاوەیەک لە وەزارەتی سامانە سرووشتییەکان بە ئاڤای گوت: ئامادەکاری تەواو بۆ دابەشکردنی نەوت کراوە و نەوت گەیشتووەتە کۆگاکان، لەم چەند ڕۆژە دەست بە ڕێکارەکانی دابەشکردنی دەکرێت و هەر خیزانێک بڕی 200 لیتر نەوتی سپی پێدەدرێت.

لێدوانی فەرمی: د. هەڤاڵ ئەبوبەکر، پارێزگاری سلێمانی بە ئاڤای گوت، لەگەڵ تەواو گەیشتنی ئەو بڕەی بۆ پارێزگای سلێمانی دیاری کراوە، پرۆسەی دابەشکردنی نەوت لە ناوچە شاخاویی و ساردەکانەوە دواتر بۆ شوێنەکانی دیکە دەست پێدەکات.

لەلایەکی دیکەوە: ئومێد خۆشناو، پارێزگاری هەولێر لە لێدوانێکی ڕۆژنامەوانی ڕایگەیاند ئامادەکاری تەواو کراوە و لەم چەند ڕۆژە دابەشکردنی نەوت بەسەر هاونیشتمانیان دەستپێدەکات و ئەمساڵ زووتر نەوت دابەش دەکرێت.

لە هەمان کاتدا: کارزان رەئووف، بەڕێوەبەری نەوت و کانزاکانی دهۆک بە ئاڤای گوت، ئامادەکاری تەواومان بۆ دابەشکردنی نەوت کردووە، هەرکاتێک وەزارەتی سامانە سرووشتییەکان ڕێنمایی دابەشکردنی بۆ ڕەوانە کردین دەست بە پرۆسەکە دەکەین.

ئەوەی پێویستە بیزانیت: دابەشکردنی نەوتی سپی سەرەتا لە ناوچە شاخاوییەکان دەستپێدەکات، دواتر لە ناوچەکانی دیکە و سەنتەری شارەکان دابەش دەکرێت.

ژمارەکان وادەڵێن: بەپێی ژمارەی خێزانەکان نەوت بۆ پاریزگاکان تەرخان دەکرێ بەمجۆرە:

٠ هەولێر؛ 105 ملیۆن لیتر

٠ دهۆک؛ 58 ملیۆن لیتر (پارێزگای دهۆک و ئیدارەی سەربەخۆی زاخۆ)

٠ سلێمانی؛ 59 ملیۆن لیتر (پارێزگاکانی سلێمانی و هەڵەبجە و هەردوو ئیدارەی سەربەخۆی گەرمیان و ڕاپەڕین)