بڕیارێکی خێرای وەزارەتی پەروەردە بۆ قوتابییانی پۆلە ناکۆتاکان

ئاڤا نیوز

وەزارەتی پەروەردەی عێراق بڕیاری دا دوو نمرە بداتە سەرجەم قوتابیانی پۆلە ناکۆتاکان لە سەرجەم پارێزگاکانی عێراق.

ئەوەی پێویستە بیزانیت: بڕیارەکە "بە پشتبەستن بە بڕیاری دەستەی ڕا لە کۆبوونەوەی ژمارە 16ـی ڕێککەوتی 2025-9-28، و نووسراوی نووسینگەی وەزیر/ دەستەی ڕا ژمارە 5006 بەرواری 2025-9-29 بووە، بڕیارەکە قوتابییانی سەرجەم شار و پارێزگاکان دەگرێتەوە جگە لەو پارێزگایانەی دەکەونە هەرێمی کوردستان.

نووسراوی فەرمی: بەگوێرەی نووسراوێک کە لە بەڕێوەبەرایەتیی گشتیی تاقیکردنەوەکان لە وەزارەتی پەروەردەی عێراق دەرچووە و ئاڕاستەی بەڕێوەبەرایەتییە گشتییەکانی پەروەردە لە سەرجەم پارێزگاکان / جگە لە هەرێمی کوردستان کراوە، وەزارەت ئەم بڕیارانەی خوارەوەی داوە:

1.    زیادکردنی دوو نمرە بۆ خوێندکاران و قوتابیانی پۆلە ناکۆتاکان (پۆلی پێنجەمی سەرەتایی، یەکەمی ناوەندی، دووەمی ناوەندی، چوارەمی ئامادەیی، پێنجەمی ئامادەیی)، بۆ ئەو بابەتانەی کە لە ساڵی خوێندنی 2024-2025 خولی دووەمدا دەرنەچوون بە مەبەستی چارەسەرکردنی دۆخە هەستیارەکان.

2.    زیادکردنی نمرەکانی ماوەی بڕیاری پێشووتر، ئەگەر هەبوو.

3.    بڕیارەکە خوێندنی ئەکادیمی و پیشەیی و پەیمانگە هونەرییەکان دەگرێتەوە.

ئەمەش بزانە: ئەم بڕیارە هاوکاتە لەگەڵ دەستپێکردنی ساڵی خوێندنی نوێی 2025-2026  لە خوێندنگاکانی عێراق لە سەرەتای مانگی ئەیلوولی ڕابردوودا.