لە دوو هەفتەی داهاتوو ڕێگای گۆمەسپان – سماقووڵی دەکرێتەوە

ئاڤا نیوز

کارکردن لە بەشی هەرە زۆری شەقامی گۆمەسپان – سماقووڵی تەواو بووە و ڕۆژانی داهاتوو کاری هێڵکاری و دانانی هێما بۆ ڕێگاکە دەکرێت، ئاڤا میدیا زانیویەتی ڕێگاکە لە دوو هەفتەی داهاتوودا دەکرێتەوە.

وێنە گەورەکە: لە ماوەی ساڵانی ڕابردوو کۆمەڵێك ڕێگای نوێ و ستراتیژی بەپێی ستانداردە جیهانییەکان لە ناوچە جیاوازەکانی کوردستان دروست کراون و خراونەتە خزمەتی هاونیشتمانیانەوە، تەنیا لە ماوەی کابینەی نۆیەمدا زیاتر لە 700 پرۆژەی ڕێگاوبان کاریان تێدا کراوە، نزیکەی 17 هەزار هێمای هاتووچۆ لە شەقامەکانی کوردستاندا دانراون.

لێدوانی فەرمی: ئەمیر عەبدولخالق، بەڕێوەبەری پڕۆژەکانی ڕێگاوبانی کۆمپانیای هێمن گرووپ بە ئاڤای وت: لە 99٪ پڕۆژەی ڕێگای گۆمەسپان-سماقووڵی تەواو بووە، تەنیا وردەکاری هێڵکاری و هێماکانی هاتووچۆی ماوە، بۆیە پێشبینی دەکەین لە دوو هەفتەی داهاتوو ڕێگاکە بە ڕووی هاووڵاتیاندا بکرێتەوە. 

زانیاریی زیاتر: پڕۆژەکە ستراتیژییە و درێژییەکەی 22 کیلۆمەتر دەبێت، دوو سایدەکە لە دوو ڕێڕەو لەگەڵ ڕێڕەوێکی فریاگوزاریی بە پانی 10 مەتر بۆ هەر ئاراستەیەک پێکدێت، چواڕیانی گۆمەسپان بە ڕێگای سەرەکیی سماقووڵی دەبەستێتەوە و بە دەوری بەنداوی گۆمەسپاندا دەسووڕێتەوە. 

لەلایەکی دیکەوە: لە ڕێگاکەدا سێ بەرزە پرد و شەش ژێر پرد و 70 ئاوبەری سندووقی بە درێژی و قەبارەی جیاواز هەیە، 300 هەزار تۆن ماددەی پۆلیمەری تێدا بەکارهاتووە. لە سەرەتای دەستپێکردنی پڕۆژەکەوە 600 ئامێری جۆراوجۆر و 2000 كرێكار و كارمەندی خۆماڵی کاریان تێدا کردووە.

بۆچی گرنگە: ڕێگاکە بە دەوری بەنداوی گۆمەسپاندا دەسووڕێتەوە، کار ئاسانی بۆ گشت گوندەکانی سنوورەکە دەکات، لە داهاتووشدا دەبێتە ناوچەیەکی دیار و سەرنجڕاکێشی گەشتیاری لە هەرێمی کوردستان و عێراق.