لە ئێران مانگی ڕابردوو 187 كەس لەسێدارە دراون

ئاڤا نیوز

لە مانگی ئەیلوولی ڕابردوودا، سزای لەسێدارەدانی 187 بەندكراو لە گرتووخانەكانی ئێران جێبەجێ كراون، بەراورد بە ئاماری دوو دەیەی ڕابردوو؛ ڕێژەكە زۆرترینە، لەپاڵ ساغبوونەوەی تاوانەكانی كوشتن و ماددەی هۆشبەر، سزادراونی سیاسیش بە تۆمەتی سیخوڕیكردن و تێكدانی ئاسایشی وڵات، لەسێدارەدراون.

زانیاریی بەدەستهاتوو: بە پشتبەستن بە داتا تۆمارکراوەکان لە ناوەندی ئامار و بەڵگەنامەکانی ڕێکخراوی مافی مرۆڤی هەنگاو، لە مانگی ئەیلوولی ئەمساڵدا 187 بەندكراو لە گرتووخانەكانی ئێران لەسێدارەدراون كە 35 حاڵەتیان هاونیشتمانیانی كوردن، هەروەها شەش كەیسی لەسێدارەدانیش ئافرەتن.

زانیاریی زیاتر: بەپێی بەدواداچوونەكانی ڕێكخراوی هەنگاو، زۆرترینی كەیسەكانی لەسێدارەدان بەهۆی ساغبوونەوەی تاوانی ماددەی هۆشبەرە كە 92 حاڵەتە، هەروەها 90 كەس بەتۆمەتی كوشتنی بە ئەنقەست لەسێدارەدراون، سێ كەسیش بە تاوانی چالاكی سیاسی و، دوو حاڵەت بە تاوانی چالاكی مەزهەبی، سزای لەسێدارەدانیان بەسەردا جێبەجێ كراوە.

ئەوەی پێویستە بیزانیت: لەكۆی دۆسیەكانی سزای لەسێدارەدان، تەنها هەشت حاڵەتیان واتە 4%ـی كۆی حاڵەتەكان لە سەرچاوە فەرمییەكانی ئێران و ماڵپەڕە پەیوەندیدارەكان بە دەزگای دادوەرییەوە بڵاوكراونەتەوە، سزای لەسێدارەدانی 14 بەندكراو بەشێوەی نهێنی و بەبێ ئاگاداری كەسوكاریان و بەبێ ڕەچاوكردنی مافی دوایین چاوپێكەتن لەگەڵ خانەوادەكەیدا، جێبەجێ كراوە.