حەوتەمین پێشانگەی نێودەوڵەتیی سلێمانی بۆ کتێب دەکرێتەوە

ئاڤا نیوز

بە بەشداری زیاتر لە 250 ناوەندی چاپەمەنی و لە 15 وڵاتی جیهانەوە، حەوتەمین پێشانگەی نێودەوڵەتیی سلێمانی بۆ کتێب دەکرێتەوە.

لێدوانی فەرمی: د. هەرێم عوسمان، وتەبێژی پێشانگەی نێودەوڵەتیی سلێمانی بۆ کتێب بە ئاڤای ڕاگەیاند، ڕۆژی هەینی 3-10-2025، لە ساڵیادی کۆچی دوایی مام جەلال، سەرۆککۆماری پێشووتری عێراق پێشانگەکە دەکرێتەوە و بۆ ماوەی 10 ڕۆژ بەردەوام دەبێت، پێشانگەکە حەوتەمین خولیەتی، زیاتر لە 250 ناوەندی چاپەمەنی  کە زیاتر لە 15 وڵاتەوە هاتوون، بەشدار دەبن.

هاوکات وتەبێژی پێشانگاکە باسی لەوەشكرد، پێشانگەکە ڕۆژانە لە کاتژمێر 10:00ی بەیانی تاوەکو 8:00ی شەو کراوە دەبێت و بە درێژایی ڕۆژەکان چالاکی وەک "سیمینار و پانێل و  ناساندنی کتێب، تەنانەت موزیک و شیعر خوێندنەوە" پێشکەش دەکرێت.

زانیاریی زیاتر: جیا لە نمایشکردنی کتێب، ڕۆژانە چالاکیی جۆراوجۆر پێشکەش دەکرێن کە میوانەکان لە وڵاتانی دەرەوە بانگهێشتکراون.

ئەمەش بزانە: ئەو کتێبانەی لە پێشانگەکە نمایش دەکرێن، هەمەجۆرن و بابەتی "بابەتی منداڵان و فکر و فەلسەفە و هونەر و کولتوور" لەخۆدەگرێت، لەوانەیە سەرجەمیان بگاتە سەرووی یەک ملیۆن ناونیشان.