شاندی دەم پارتی بۆ دیدار لەگەڵ ئۆجەلان بەرەو ئیمرالی بەڕێكەوت

ئاڤا نیوز

کەمێک پێش ئێستا، شاندی ئیمرالی دەم پارتی، بە مەبەستی ئەنجامدانی دیدار لەگەڵ ڕێبەری زیندانیكراوی پەكەكە، بەرەو دوورگەی ئیمرالی بەڕێكەوت.

وێنە گەورەكە: پرۆسەی ئاشتی لە توركیا، دوای چەكدانانی پەكەكە لە مانگی تەمموزی ڕابردوو و خۆهەڵوەشاندنەوەی پارتەكە لەسەر داوای ڕێبەری زیندانیكراوی پەكەكە، چووەتە قۆناغی كردەیی، دامەزراندنی كۆمیسیۆنی پەرلەمانی لەلایەن سەرۆككۆماری توركیاوە، ئەوەندەی دیكە هەنگاوەكانی پرۆسەی ئاشتی خێراتر كردووە.

زانیاریی بەدەستهاتوو: هەژماری فەرمیی 'ستێرك تیڤی' لە تۆڕی كۆمەڵایەتیی تەلەگرام بڵاویكردووەتەوە،  پارتی یەکسانیی و دیموکراسیی گەلان (دەم پارتی) بە مەبەستی ئەنجامدانی دیدار لەگەڵ عەبدوڵڵا ئۆجەلان، ڕێبەری زیندانیكراوی پەكەكە، بەرەو دوورگەی ئیمرالی بەڕێکەوت.

پەیوەست بەم بابەتە: بەرپرسانی دەم پارتی بەردەوام داوا دەکەن شاندێکی کۆمیسیۆنی پەرلەمانی سەردانی ئۆجەلان بکات و گوێ لە سەرنج و پێشنیازەکانی بگرێت بۆ سەرخستنی پرۆسەی ئاشتی و خودی ئەو پارتەش بە پێنج ئەندام لە کۆی 51 ئەندام لە کۆمیسیۆنەکەدا بەشدارە.

لەلایەكی دیكەوە: کۆمیسیۆنی مافی مرۆڤ و یاسایی دەم پارتی، سەبارەت بە سەلاحەدین دەمیرتاش و فیگەن یوکسەکداغ، هاوسەرۆكانی زیندانیكراوی دەم پارتی، ئاماژەی بە بڕیارەکانی کۆمیتەی وەزیرانی ئەنجوومەنی ئەوروپا کرد و داوای ئازادکردنی سەرجەم زیندانیانی سیاسی کرد کە بە تۆمەتی پەیوەندییان بە دۆسیەی کۆبانێ دەستگیرکراون.