هایتێکسی ئەمساڵ بەشێوەیەکی جیاوازە و ئاڤا میدیا سپۆنسەری سەرەکییەتی

ئاڤا نیوز

ناوەڕاستی ئەم هەفتەیە بە سپۆنسەری ئاڤا میدیا شەشەمین پێشانگای هایتێکس 2025 "پێشانگای نێودەوڵەتی هەولێر بۆ تەکنەلۆژیا" دەکرێتەوە و بەشی زۆری ئامادەکارییەکان تەواو کراون.

وێنە گەورەکە: هایتێکس لە ڕیزبەندی شەشەم گەورەترین پێشانگاکانی تەکنەلۆژیایە لە ڕۆژهەڵاتی ناوەڕاست. شەشەم ساڵە لەسەر یەک لە هۆڵی پێشانگا نێودەوڵەتییەکانی هەولێر لەناو پارکی سامی عەبدولڕەحمان دەکرێتەوە.

لێدوانی فەرمی: ڕاڤە ئەردەلان، ئەندامی تیمی ڕێکخەرانی پێشانگای هایتێکس و بەرپرسی بەشی کۆمپانیاکان بە ئاڤای ڕاگەیاند: پێشانگای ئەمساڵ بە بەشداری زیاتر لە 15 وڵات بەڕێوەدەچێت. بۆ یەکەمجارە 37 کۆمپانیای نێودەوڵەتی، 11 کۆمپانیای عێراقی و  74 کۆمپانیای ناوخۆی هەرێمی کوردستان بەشدار دەبن، کە کۆی گشتی دەکاتە 122 کۆمپانیا. جگە لەوە 20 خاوەنکاری بچووکی ناوخۆیی شوێنێکیان وەک پاڵپشتی و پشتگیری بزنسی ناوخۆیی پێدراوە کە حەوت بزنسیان بە یارمەتی ڕێکخراوە نێودەوڵەتییەکان پشتگیری دارایی دەکرێن.

گۆشەیەکی دیکەی دیمەنەکە: تا ئێستا حەوت هەزار کەس پێش وەختە لەڕێگەی ئەپڵیکەیشنی هایتێکسەوە ناوی خۆیان تۆمارکردووە، بۆ ئەوەی سەردانی پێشانگاکە بکەن. سەردانیکارانی هایتێکس بۆ ئەمساڵ دەتوانن ببنە خاوەن چەندان دیاری و سوپرایز، کە لەلایەن کۆمپانیا بەشداربووەکانەوە دابینکراوە وەک: گەشتێكی تایبەت بۆ دەرەوەی وڵات بۆ بەشداری کردن لە کۆنفرانسێکی نێودەوڵەتی تەکنەلۆژی لە ئیمارات، بردنەوەی ئایفۆن 17ـی پڕۆماکس، هاوکات بۆ ماوەی شەش مانگ هاتووچۆی خۆڕایی بۆ قوتابیەکی زانکۆ دابیندەکرێت.

زانیاریی زیاتر: وا بڕیارە شەشەمین پێشانگای هایتێکس لە ڕۆژی 2025-10-07 بکرێتەوە، و بۆماوەی چوار ڕۆژ بەردەوام دەبێت.