هەسەدە و هێزەکانی سووریا هێز کۆدەکەنەوە و دانوستانەکان بێ ئەنجام مانەوە

ئاڤا نیوز

دوای شکستی کۆبوونەوەکانی نێوان هێزەکانی سووریای دیموکرات و حکومەتی سووریا، هەسەدە هێزی زیاتر ڕەوانەی ناوچەکانی ژێر کۆنترۆڵی خۆی لە ڕۆژهەڵاتی حەلەب دەکات.

ئەوەی پێویستە بیزانیت: بە گوتەی سەرچاوەیەکی نزیک لە هەسەدە، بڕیار بوو ڕۆژی هەینی ئەسعەد شەیبانی، وەزیری دەرەوەی سووریا، لەگەڵ هاوسەرۆکی فەرمانگەی پەیوەندییەکانی دەرەوەی ئیدارەی خۆسەر لە دیمەشق، بە چاودێری ئەمریکا کۆببێتەوە، بەڵام حکومەتی سووریا ڕەتیکردووەتەوە کۆبوونەوەکە ئەنجام بدات.

زانیاریی بەدەستهاتوو: هێزەکانی سووریای دیموکرات 'هەسەدە'، ئێوارەی ڕۆژی هەینی، دەیان چەکدار و زرێپۆش و چەک و تەقەمەنی لە دێرەزوور و حەسەکە گواستووەتەوە بۆ ناوچەکانی ژێر کۆنترۆڵی خۆی لە گوندەوارەکانی ڕۆژهەڵاتی حەلەب.

ئەوەی ئێستا ڕوودەدات: ئەم جموجۆڵەی هەسەدە هاوکاتە لەگەڵ بەردەوامبوونی بڕینی ڕێگای ئۆتۆسترادی دێر حافر - حەلەب لەلایەن هێزەکانی حکومەتی سووریاوە کە نزیکەی هەفتەیەکە ڕێگاکە داخراوە. هاوکات حکومەتی سووریا ئەو ڕێگا لاوەکییانەی بڕیوە کە دەچنە گەڕەکانی شێخ مەقسود و ئەشرەفییە، کە دەکەونە ژێر کۆنترۆڵی هەسەدە و دەستیشیان بە لابردنی ئەو بەربەستانە کردووە کە لە نێوان ناوچەکانی ژێر کۆنترۆڵی هەردوو لادا بوون.

گۆشەیەكی دیكەی دیمەنەكه: پێشتر ئیلهام ئەحمەد، هاوسەرۆکی فەرمانگەی پەیوەندییەکانی دەرەوەی ئیدارەی خۆسەر ڕایگەیاندبوو: "تۆم باراک، نێردەی ئەمریکا بۆ سووریا هەوڵێکی زۆر دەدات بۆ ئەوەی زوو بگەینە ڕێککەوتن، ترس و نیگەرانییەکانی ئەوەیە کە ڕەنگە دۆخەکە جارێکی دیکە بتەقێتەوە.