ئێران شەش کەس بە تۆمەتی تیرۆر لەسێدارە دەدات

ئاڤا نیوز

دەستەڵاتی دادوەریی ئێران ڕایگەیاند شەش ئەندامی گرووپێکی "تیرۆریستی" لەسێدارە داوە کە بە تاوانی هێرشی چەکداری لە پارێزگای خوزستان لە باشووری ڕۆژئاوای ئێران سزا دراون.

ڕاگەیێنراوی فەرمی: ماڵپەڕی میزان، کە زمانحاڵی دەستەڵاتی دادوەریی ئێرانە، بڵاویکردەوە، "حوکمی لەسێدارەدان بۆ شەش تیرۆریستی جوداخواز، کە لە ساڵانی ڕابردوودا زنجیرەیەک ئۆپەراسیۆنی چەکداری و بۆردومانیان ئەنجام دابوو و بە هۆیەوە ئاسایشی پارێزگای خوزستانیان کردبووە ئامانج، لە بەرەبەیانی ئەمڕۆ (شەممە، 4-10-2025) جێبەجێکرا".

زانیاریی زیاتر: لەسێدارەدراوەکان لە ساڵانی 2018 و 2019 دەستیان هەبووە لە کوشتنی دوو ئەفسەری پۆلیس و دوو ئەندامی بەسیج. هەروەها دانیان ناوە بە پلاندانان و جێبەجێکردنی کردەوەی تێکدەرانەی وەک دروستکردن و چاندنی بۆمب و تەقاندنەوەی بەنزینخانەی خورەمشەهر. 

لەلایەکی دیکەوە: لە لەسێدارەدانێکی جیادا، ڕۆژی شەممە، ئێران کەسێکی دیکەیان بە تۆمەتی 'دژایەتیکردنی خودا' هەڵواسی. ئەم کەسە ناو سامان محەمەدییە، ساڵی 2013 دەستگیر کرا، تۆمەتبار بوو بە ئەندامیەتی لە "گرووپە تیرۆریستی و تەکفیرییەکان" و هەروەها بەوەی کە لە کوشتنی وتاربێژی مزگەوتێکی ڕۆژئاوای سنە لە ساڵی 2009 و لە دزی و ڕفاندنی چەکدارانە و کوشتنی سەربازێک دەستی هەبووە. 

ئەمەش بزانە: هەفتەیەک پێشتر ئێران کەسێکی دیکەیان بە تۆمەتی سیخوڕیکردن بۆ ئیسرائیل لەسێدارە دا.

باکگراوند: لە دوای چین، ئێران زۆرترین ژمارەی لەسێدارەدان لەسەر ئاستی جیهان ئەنجام دەدات.