ئیسرائیل لەبارەی پلانەکەی ترەمپ: ئاگربەست نییە، هێرشەکان کەم دەکرێنەوە

ئاڤا نیوز

هەرچەندە هەر یەکە لە ئیسرائیل و حەماس بە پلانی ئاشتی ترەمپ ڕازیبوون، بەڵام هێشتا بەشێوەیەکی فەرمی ئاگربەست ڕانەگەیێنراوە، سەرچاوەیەکی ئیسرائیلیش دووپاتیدەکاتەوە، 'لە ئێستادا ئاگربەست لەئارادا نییە بەڵکو هێرشەکان بەجۆرێک کەمدەکرێنەوە'

وێنە گەورەکە: دوای ئەوەی دۆناڵد ترەمپ سەرۆکی ئەمریکا پلانی 20 خاڵی ئاشتی بۆ غەززە  خستەڕوو، هەر دوای ڕاگەیاندنی پلانەکە ئیسرائیل ئامادەیی خۆی دەربڕی و دوێنیش حەماس وەڵامی پلانەکەی بە ئەرێنی دایەوە و بەمەش ڕاستەوخۆ قۆناغی یەکەمی پلانەکەی ترەمپ دەستپێدەکات.

زانیاریی بەدەستهاتوو: دەسەڵاتی پەخشی ئیسرائیل لە زاری سەرچاوەیەکی سیاسییەوە بڵاویکردەوە، "لەم کاتەدا ئاگربەست نییە، بەڵکو کەمبوونەوەی تووندی هێرشەکانە، هاوکات دانوستانەکانی داهاتوو خێرا دەبن''.

زانیاریی زیاتر: سەرچاوەکە دەشڵێت، بڕیارە ئەمشەو دانوستانەکان دەست پێبکەن ئەو شاندە ئیسرائیلییەی کە چاوەڕوان دەکرێت بەشداری لە دانوستانەکاندا بکەن، بریتین لە ڕۆن دێرمر، وەزیری کاروباری ستراتیژی و گال هیرش، بەرپرسی بەندکراوان و ونبووەکان، لەگەڵ بەرپرسانی ئەمریکی کۆدەبنەوە.

لەلایەکی دیکەوە: ترەمپ دوای ڕازیبوونی حەماس ڕاستەوخۆ داوای لە ئیسرائیل کرد هێرشەکانی ڕابگرێت.