لە عێراق 46 کەس بەتۆمەتی کڕین و فرۆشتنی کارتی دەنگدان دەستگیر دەکرێن

ئاڤا نیوز

دەزگای ئاسایشی نیشتیمانی عێراق ڕایگەیاند، لە سێ پارێزگا دەستیان بەسەر هەزار و 841 کارتی بایۆمەتری دەنگداندا گرتووە و  46 کەسیش بەتۆمەتی کڕین و فرۆشتنی ئەو کارتانە دەستگیر کراون.

وێنە گەورەکە: بڕیارە 11ـی 11ـی ئەمساڵ، هەڵبژاردنی پەرلەمانی عێراق بکرێت، کۆمیسیۆن بەردەوامە لە ئامادەکارییەکان بەتایبەت کارتی دەنگدان، دەنگدەران ڕۆژانە سەردانی بنکەکانی تۆماری کارتی بایۆمەتری دەکەن و کارتەکانیان وەردەگرنەوە.

ڕاگەیێنراوی فەرمی: دەزگای ئاسایشی نیشتیمانی عێراق لە ڕاگەیێنراوێکدا ڕایگەیاند، دوای چاودێریی ورد و لە ئۆپەراسیۆنێکدا لە بەغدا، ئەنبار و نەینەوا 46 کەس بەتۆمەتی کڕین و فرۆشتنی کارتی دەنگدان دەستگیرکران، لە کاتی دەستگیرکردنی ئەو کەسانەشدا دەست بەسەر هەزار و 841 کارتی دەنگداندا گیراوە، تۆمەتبارەکانیش پەڕاوی لێکۆڵینەوەیان بۆ کراوەتەوە و ڕووبەڕووی دادگا دەکرێنەوە.

لەلایەکی دیکەوە: فەرماندەیی ئۆپەراسیۆنەکانی بەغداش ڕایگەیاند، لە 48 کاتژمێری ڕابردوو، لە چەند ناوچەیەک بازگەی لەناوکایان داناوە و پێنج کەسیان دەستگیرکردووە کە "50 کارتی دەنگدان، 13 ماستەرکارد، پاسپۆرت و درۆنی وێنەگرتنیان" پێبووە و مۆڵەتی خاوەنەکانیان نەبووە بۆ هەڵگرتنیان، جگەلەوەش دەستیان بەسەر چەکی بێ مۆڵەت، ئۆتۆمبێل و ماتۆڕسکیدا گرتووە کە ڕێنماییەکانیان جێبەجێنەکردووە.

پێشتر هادی عامری، ئەمینداری ڕێکخراوی بەدر لە دیالە قسەی بۆ لایەنگرانی کرد و ڕایگەیاند، کڕین و فرۆشتن بە کارتی دەنگدانەوە گەیشتووەتە ئاستێک کە "جێگەی شەرمەزارییە"، ئاشکراشی کرد کە بازاری کڕین و فرۆشتنی کارتی دەنگدان گەرمە و ئێستا نرخی یەک کارتی دەنگدان گەیشتووەتە 300 هەزار دینار.