پرۆژەی ڕووناکی لە ڕانیە دەست پێ دەکات و لە زاخۆ و سۆران لە تەواوبووندایە

ئاڤا نیوز

تیمی پڕۆژەی ڕووناكی، دەستیان بە ئامادەكارییەكان كردووە بۆ گەیاندنی كارەبای 24 كاتژمێری بە هەر سێ ئیدارە سەربەخۆكەی سۆران، ڕاپەڕین و زاخۆ؛ سبەی یەكشەممە فۆڕمی خۆتۆماركردن لە پڕۆژەكە لە ئیدارەی ڕاپەڕین دەستپێدەكات و لە هەردوو ئیدارەی زاخۆ و سۆران، دابەشكردنی فۆڕمی خۆتۆماركردن تەواوبووە.

چیرۆکی سەرەکی: پرۆژەی ڕووناكی بۆ دابینكردنی كارەبای 24 كاتژمێری لە هەر چوار پارێزگاكەی هەرێمی كوردستان گەیشتووەتە قۆناغی كۆتایی و لە ئایندەیەكی نزیكیشدا لە هەر سێ ئیدارە سەربەخۆكانی زاخۆ، سۆران و ڕاپەڕین جێبەجێ دەكرێت.

لێدوانی فەرمی: سەرچاوەیەك لە تیمی پڕۆژەی ڕووناكی تایبەت بە ئاڤای ڕاگەیاند، سبەی یەكشەممە 5ـی ئۆكتۆبەر، لە ئیدارەی سەربەخۆی ڕاپەڕین دەست دەكرێت بە دابەشكردنی فۆڕمی خۆتۆماركردن لە پڕۆژەی ڕووناكی.

زانیاریی زیاتر: دابەشكردنی فۆڕمی تۆماركردن لە هەردوو ئیدارەی زاخۆ و سۆران دەمێكە تەواوبووە، پاش ئەوە؛ كارەكانی دانانی پێوەری زیرەك و كارە تەكنیكییەكانی دیكە لە هەفتەیەك بۆ دوو هەفتەی داهاتوو دەستپێدەكات.

ئەمەش بزانە: هەوڵەكان بەو ئاراستەیەن بەر لەكۆتایی ئەمساڵ پڕۆژەكە بەتەواوی لە هەرسێ ئیدارەی سەربەخۆی سۆران و ڕاپەڕین و زاخۆ بەردەست بێت و هاونیشتمانیان ببنە خاوەنی كارەبای 24 كاتژمێری.